Ehi arihe momahi wakangamwa mOnamibia Orehi nomauhonapare wombazu omatjeverero po uriri wehi ndi okutjeverera po ehi arihe.

Oveta yEhi oyo nai ndja twirwe kotjitihe mOmbongarero yOtjiwaṋa kutja ouṋepo wayo u hungirire kuyo mai tja nao. Oro ndi mari sokurira rombwiro yoviwaṋa avihe vyombazu mbi turira muro. Komekurisiro wombwiko nombwiro yovandu avehe va Namibia nu tjinene ovahinehi na imba mbe hi na ehi nda yenene.

Kape na ngu nousemba wokuranda ehi ndi nu tjingetjo wina okunana orumbo muro. Ehi ndi ku kangamwa eyazema uriri. Pendje tji pe nohepero koviungura vyotjiwaṋa atjihe. Omasa poo ousemba wokuyandja ehi mehi rakangamwa ousemba womombazu yeri mouhonapare wombazu kehi yondjeverero yOtjirata Tjehi Rakangamwa. 

Tji pe na ombata pokati komutjite womaningiriro komayazemeno wehi rakangamwa kousemba wombazu nouhonapare wombazu okutja Oministera yOtutumbo nOvikunwa nOmatungururiro Wehi mai zikamisa omuyapure. Nomuyapure ngwi tje ha yenenene okuzengurura ombata ndji omaningiriro nga aye vasisiwa kombanda kOtjombanguriro Tjehi. Tji pe hi na ouhonapare wombazu omundu auhe ku ma yenene okunigira ousemba wokuyazema ehi Oministera mai yenene okuzikamisa Okomiti yEhi. 

Ouhonapare wombazu ngunda au hi ya itavera komaningiriro wehi rakangamwa mai sokuraisa omaningiriro nga kotjiwaṋa oure womayuva o-21. Ena romuningire wousemba wokuyazema ehi; ounene wehi ndi ma ningire; ehi ndi mari ningirwa pu riri; ondando ku mari ningirirwa; kutja omuningire u nomausemba yengapi rukuru; nokutja oukee usemba mbu ma ningire. Kutja mbe nouzeu nomanigngriro nga ve yenene okuraisa ouzeu momayuva o-21 nga. 

Tjingetjo ouhonapare ku kwa tjitwa omaningiriro mau sokutjita kutja oyo ye tjivisiwe kombepo komurari wondjivisiro mbu pita motjiwaṋa tjawo mehi rakangamwa; ye pite mongoramambo ndji ya morukondwa rwawo. Nu ndoovazu kangamwa okaṋepo kotjiwaṋa ke nouzeu nomangiriro nga ouhonapare wombazu mau sokuhaamisa ombongarero yakangamwa ngu nouzeu okuuraisa.