Louisa Kamana iumwe wozendekurona ozengi ngamba nḓe hi nondambo nehuno na wina ndi ha tamunwa poo Ovaherero nOvambanderu otja tji ve heya: “omuatje womusyona ke nohiwo.”
Tjinenenene mena rokutja omukazendu. Posi ya Onongo Vezuvira Murangi me mu vandurura mu novakwao ovengi varwe otjovakazendu mba kara kehi yondjuriro ondjaukise ohinambinḓu komutima kehi yohuurire yEhi rOvandoitji ndja twara koviṱiro ovindjandja vyOvambanderu, Ovaherero nOvakwena. Mombura ndji o 1903 Kamana nomurumendu we va ri mouyenda pu nokanatje kawo komayuva o-14 pokati ka Maruru na Tjandjomboimue. Ondjirakati ave hakayene nomurandise wOmundoitji, Dietrich. Ongurova ndjo Omundoitji ngwi a kondjo okutjera Kamana tja panḓa Omundoitji ngwi e mu yaha a zepa nokanatje ke. Tjandje Kamana u nozombura o-24.
Mena rokutja Kamana wa kupirwe mOtjizeraeua tjOmbara ya Tjizingue, Dietrich wa twarewa kOtjombanguriro. Dietrih rutenga e tji isiwa posi ya mena rorunywaa rotjiwaṋa a pewa ozombura ndatu mOtjovakamburwa na hindwa, a yarurwa kehi re rOvandoitji. Pu mape hee kutja eye mouatjiri ke nomberero ndja muna. Onongo Murangi ondjuriro ya Kamana ndji we i serekarere mehungi re mEhi rOvandoitji pomakutjururiro wonguyu romuvanda mbwa rukirirwe ku Kamana mu tjimwe tjovihuro ovinene mehi rOvandopitji, itji Ohamburg momayandero womueze mbwa zuko. Na tja otjitjittwa tjomazemburukiro wena re itji otjokutja eye a ha zembwa na imbi wina omakuruhungi omengi tjimuna ingo wa Kamana. Nokuzenga nokuzengisiwa tjimuna tji ye zengisiwa nokuzemisiwa.
Murangi ma tja oumba Kamana mbwe rihaka ko ka mbwari omautiro nu kawari wotjikando tjimwe iho tje uriri nda indjo onḓiro ye tjingetjo. “Otjitandi kovakazendu katji utirire mo 1903 poo 1904, otjikuru okuza komeero wovahandure vOvandoitji Onamibia. Tji ya ri 2 ku Kozonjanga mo 1893 ovimbumba vyovarwe vOvandoitji kehi ya Curt von Franscoi, vya wirira omaturiro wa Hendrik Witbooi pOhoornkranz. Ovakazendu novanatje o-78 ave zepewa,” Murangi ma tja.
Mba hupa mu mwari oserekaze ya Witbooi avee ku paterwa motjovakamburwa mOtjomuise. Otja ku Murangi inga yari omautiro uriri notjiraisiro tjokutja Otjiṱiro Otjindjandja matji sana pi.