ONGWEDIVA – Omukwaniilwa welelo laNdonga Fillemon Shuumbwa Nangolo okwa vela ombedi ovadali molwoikumungu ya ninga ihapu yovanyasha ve na oudu wopamadilaadilo eshi tava dipaa nokumonifa ovanhu oiponga.
Okwa yelifa ta ti ovanyasha vopaife otava vele oudu wopamadilaadilo shaashi va fingwa molwaashi tava longifa oupule, okuvaka po omaliko ovanhu, osho yo okukala inava fimaneka oinima yomapata avo.
Shuumbwa okwa li ta nyamukula e likwatelela koikumungu yovanyasha tava vele oudu wopamadilaadilo nokukala tava longele ovakwapata vavo ominyonena.
Okwa ti pefimbo leedula edi dopaife kaku na vali omaudu opamadilaadilo ngaashi sha kala meedula da pita shaashi ovanhu paife ova fingwa ile va danena oinima yovanhu.
“Omunhu e na oudu wopamadilaadilo iha kufa ekatana ile ombele ndele ta dipaa inakulu ile ina. Osho ovanhu tava li oupule ile ve na oimina yomapata avo itai ende nawa,” ta ti.
Omukwaniilwa okwa fatulula moule ta ti ovanyasha vamwe ohava kala tava pewa oinima ya nyika oulodi yomapata avo ashike ngeenge okwe shi anye otashi eta opo omunhu a ye eemwengu.
“Ovakulunhu natu popyeni nounona vetu kombinga yoinima yomapata etu. Omunyasha ngeenge ta i koushimba ta ka longa na lombwelwe opo aha ka vake oinima yovanhu shaashi ota dulu okweetela epata lavo,” ta ti.
Okwa yelifa ta ti ovanyasha vamwe ohava lambalala oinima ya nyika oupule ngaashi okweendwa konima kovalumenhu vakwao nelalakano lokupewa oimaliwa ile omaliko.
“Oinima aishe oyo nda popya otai eta ovanhu opo va kwatwe komhepo youdu wopamadiladilo. Onghee ovadali ova dopa okupopya nounona vavo,” ta ti.
Okwa kumaida ovadali opo va kaleke po efimano lomifyuululwakalo efimbo keshe.
Opolifi moshitukulwa shaShikoto oye lipyakidila nokukonakona oshibofa shomukainhu weedula 39 e na oudu wopamadiladilo vati a dipaa inakulu weedula 89 nekatana meumbo lavo.
Oshiningwanima osha ningwa komukunda Oshamba moshikandjohoololo shaNiipa Osoondaxa efimbo longula.
Nakufya okwa tongololwa oye Julia Micheal omukalimo womukunda Oshamba.
Omukulunhu koshikondo shokukonakona oimbuluma wopolifi moshitukulwa shaShikoto, omupedukomufala Titus Ekandjo okwa koleka oshiningwanima eshi.
Opolifi oya hokolola tai ti omulumenhu umwe womushiinda shomukulupe okwa ya keumbo lavo efimbo longula opo e ke mu kwafele okutunga okatala.
Otaku hokololwa kutya omulumenhu ou eshi a fika meumbo okwa hanga omufekelwa ou e li nakudipaa inakulu ta teleke eexuxwa mbali kepata.
Opolifi oya hokolola tai ti konima yefimbo omulumenhu okwa mona omufekelwa ta nuka mekende ta di monduda yomukulupe ndele ta i mepya a ka kala ofika koshi yomuti.
Otaku hokololwa kutya omulumenhu okwa ninga omapekapeko ndele ta kongo omukulupe ashike ine mu mona.
Konima yefimbo, omulumenhu okwa vandamena monduda yomulukupe ndele ta mono olutu laye li li mekungu lohonde.
Opolifi oya hokolola tai ti monduda yomukulupe omwa hangika ekatana nombele yokapi ya kalela omudimba.
Otaku hokololwa kutya omukulupe okwa tetwa eenyala adishe.
Okudja opo omulumenhu okwa endelela ndele ta lopotele ovashiinda vakwao.
Opolifi oya hokolola tai ti omukulupe oha di meumbo laye oye awike.
Otaku hokololwa kutya omufekelwa oha di kOndangwa omanga omafimbo amwe natango oha di koshitukulwa shaMusati kofamili yaye.
Omufekelwa okwa fika meumbo lomukulupe Olomakaya nelalakano loku mu talela po.
Otaku hokololwa kutya omukainhu e na oudu wopamadilaadilo okwa ninga efimbo lile ina talela po inakulu.
Omufekelwa okwa holoka momhangu yamengastalata waNdangwa, nonande e na oudu wopamadiladilo.
Okwa twalwa koshipangelo opo a twikile nokupewa epango loudu wopamadiladilo.
Okwa didilikwa ovanhu ve ne oudu wopamadiladilo tava hepeke ovakwapata vavo omo ovanhu ninga oihakanwa yokudipawa nokumonifwa oshiponga.
Okudja omudo wa dja ko koshitukulwa shaHangwena okwa lopotwa oibofa ihapu yovakulunhu, nounona va dipaa nokumonifwa oshiponga kovanhu ve na oudu wopamadiladilo.
Neudo koshitukulwa shaHangwena okwa lopotwa omulumenhu weedula 26 e na oudu wopamadiladilo a dipaa inakulu weedula 88 ndele ta monifa okatekulu keedula 14 oshiponga nekatana.
Opolifi oya hokolola tai ti omulumenhu ou okwa dipaa inakulu nekatana ndele ta tomeke omundilo noku mu kupula mo.