OKALONGO – Ehangano lyedhina Retirement Fund Solutions (RFS) olya yambidhidha osikola Ondeipanda Primary kOkalongo moshitopolwa shaMusati niitungithi yosikola yongushu yi vule N$35 000.

Omukuluntusikola pOndeipanda Primary ndjoka yi na aalongwa ya konda 400 okwa ti osikola yawo oya kala ya taalela uupyakadhi woongulu dhosikola inaadhi gwana osho wo ombelewa yaalongi kaayi po.

Ta ti, onkalo ndjoka oya nyayika notayi longitha aalongi nuudhigu oshoka aalongwa oye li moongulu ya pitilila.

“Uuna tatu ningi iigongi, aalongi ohaya kala ashike ya thikama pondje yombelewa yandje ndjoka onshona oshoka itaya gwana mo,” ta popi ngaaka. 

Hamulungu okwa ti omolwonkalo ndjoka oya kala nokukonga omakwatho moshigwana opo ya vule okutsikila ko komatungo gosikola.

Ta ti, sho Kalunga ihaa dhipagelwa oyana ehangano lyo-RFS olye ya yamukula nawa kutya otali ya kwathele niitungithi, opo ya tsikile naashoka ya tameka.

Omukuluntu gwehangano lyo-RFS Marthinuz Fabianus, ngoka a yambukile momukunda Onaindiba kOkalongo okwa ti okwa li a thikitha etumwalaka lyeyambidhidho lyosikola kehangano lyawo, e tali yambidhidha noshimaliwa N$35 000. 

“Natango otatu ka tuma eshina lyokuninga ookopi ndyoka twa ndhindhilike kutya kali po mpaka. Otwa yambidhidha ngaaka ongomukalo gokushunitha wo moshigwana osho wo okuyambidhidha elongo lyi ye komeho,” ta fatulula ngaaka. 

Aavali yaanona osho wo aalongi posikola mpoka mboka ya kala nokuyambidhidha osikola ndjoka oya gandja wo olupandu kehangano lyo-RFS sho lye ya yambidhidha niitungithi yi thike mpoka. 

Oya pula wo natango omayambidhidho okuza kaanangeshefa moshilongo opo ya vule okumana shoka ya tameka, opo wo aalongwa posikola ya mone elongo lyongushu. 

-vkaapanda@nepc.com.na