ETUNDA – Oshikunino shepangelo kEtunda shi li koshitukulwa shaMusati osha tameka okuteya oihakautu notai ka landifwa koitukulwa ya yooloka.
Oihakautu oya kunwa neudo momwedi June noi li moule we hekita 22. Oshikunino Etunda osha totwa po omudo 1992. Oshikunino oshi na oule weehekita 1 300 noha shi kunwa oikunonwa ya yooloka ngaashi omapungu, eenyanga, omatama, omandjebele nosho tuu.
Omukukulunhuwilik ta wilike oshikunino Etunda, Sacky Shilyomunhu okwa ti ovanhu 50 ova kutwa pefimbo lokuteya oihakautu. “Ovanhu vamwe ova pewa eemhito doilonga tai kalelele omanga vamwe ova pewa oilonga yopokafimbo,” ta ti. Okwa weda po ta ti oshikunino Etunda osha etela ovanyasha va dja komikunda da yooloka eemhito doilonga. “Ohatu lalakanene okulwifa ondjala moshilongo osho yo okuxwaxwameka ovanhu va kale ve na ohokwe yokulonga oikulya yavo vene,” ta ti.
Shilyomunhuokwatioshikunino Etunda osha tameka okulonga oihakautu okudja omudo 2012.
Okwa ti oihakautu otai teywa fiyo omwedi Desemba molwaashi oihapu. “Eli olo efimbo liwa lokuteya oihakautu shaashi ohai landwa unene okulongifwa moitufi ya yooloka ngaashi eehango neenghali,” ta ti. Okwa ti keshe omunhu okwa manguluka okukala a landa oihakautu.
“Ohatu dulu okutuma oihakautu yau kilila kongeshefa yomunhu ile a tule mo omaindilo kutya okwa hala eeshako ngapi,” ta ti.
Okwa pula oshiwana opo shi holoke momwaalu muhapu okulanda oilandifomwa ya dja moshikunino Etunda molwaashi otashi xwaxwameke ovanafaalama va xume komesho. Kombinga ikwao, Shilyomunhu okwa ti ova taalela omashongo ngaashi oumbudi osho yo oilongifo yomashina inai wana.
Maria Jason a kutwa okukala ta longo pefimbo lokuteya oihakautu okwa ti okwa pandula eshi a mona omhito yoilonga.
“ Okwa li ashike ndi li meumbo. Paife ohandi dulu okulanda oikulya yomeumbo osho yo okulanda oipumbiwa younona yofikola,” ta ti.
Joe Nghilifaali okwa ti oshikunino Etunda ole va etela ouwa shaashi paife ohava mono oyuuyemo.
“Otwa pandula unene keemhito doilonga shaashi okwa li ashike tu li momaumbo twa mwena,” ta ti.
-fhamalwa@nepc.com.na