OKAKU-KANANGULA – Omata ngoka ga dhenge pevi koondoolopa dhimwe konooli oga gandja omukumo kaanafaalama yomomapya osho wo yiimuna, kutya nuumvo oku na omuloka omwaanawa. 

Shiyenga ShaNangombe okwa li e ga dhenge tango pevi petameko lyaKotomba, osho wo oshiwike shika moshitopolwa shaShana. Sha ikwatelela kepandja lyokomalungula lyonkalo yombepo, omvula oya ndhindhilikwa ya loko wo moshilandopangelo oshiwike shika. Natango oshitopolwa shaHangwena nasho osha lopotwa sha mono omata. 

Sonia Matheus a yambukile momukunda Okaku kaNangula moshikandjohogololo Okatana okwa ti omuloka ogwa eta omukumo gokulonga omapya gawo nuumvo. 

“Omvula ndjika otayi tu ulikile kutya otu uka pethimbo lyokulonga. 

Oyendji otaya pulathana sho omvula tayi loko momwendhi nguka, ihe shoka osho sha kala nale, mOshiwambo otaku ti omvula oya temuna,” ta fatulula ngaaka. 

Matheus okwa ti okwa ilongekidha okutula etemo momupini. Maria Nangolo okwa ti nuumvo ita mana po nando ethimbo, ota tameke okulonga epya lye kuyele, oshoka omumvo gwa yi okwa li a tameke okulonga kwa toka. 

“Omuloka gotango gwaNovomba nuumvo, itagu thigi ndje omutumba nando. Mbakumbaku oku na okulila maandjetu tango momukunda gwetu,” ta ti ngaaka. 

Ta gwedha po kutya sho okili tayi ka thika, iilya ye oya tsapuka nale. 

Omunafaalama gwiimuna, Silas Uudhila okwa ti onawa sho omvula tayi loko opo omwiidhi gu mene ishewe. 

“Otwa kanitha omwiidhi gwiimuna yetu oyindji komulilo ngoka gwa ningi ethimbo tagu fike kombuga, onkene otashi hokitha ngele omvula tayi loko mbala,” ta ti ngaaka. 

Uudhila okwa ti omimvo dha yi oya kanitha iimuna yawo molwenota nondjala onkene ngele omvula tayi loko ohashi ya etitha omukumo. 

Aanafaalama oya hambelele omuloka ngoka gwa talamitha omeya miishana nonando taga pwine po mbala oshoka evi olya sa enota noonkondo. 

-vkaapanda@nepc.com.na