Matheus David

Gobabis – Okwa tengenekwa ovanhu ve dulife 3 000 va kale va topolelwa oikulya MOshitukulwa shaMaheke. Oikulya oya yandjwa okudja mombelewa yomuprima minista nombelewa youkashikekookantu. 

Oikulya oya tengenekwa i kwafele ovanhu ava tava xupu shokadila notashi kwafele i xumife komesho mokukalamwenyo kwavo. 

Oikulya oya kwatela mo uupakete voshuuka ve li 380, omakende omaadi okulya, eendooxa dondjudo 400g di li 440 nosho yo oukutu voufila wo 10Kg ve li 250. 

Oikulya otai ka topolelwa omapata 29 oo a tengenekwa a ka palule ounona ve dulife 1 000 mefiku nokukwafelwa yo omaumbo oo ihaa tema moshitukulwa. 

Pio Nganete, ngoloneya wOmaheke ota pandula oshikonga shokuyandja oipalifwa eshi ya uda ekemo lovakalimo, nokuyandja oikulya vo ovanhu va lwife ondjala nomanyutu. 

Nganete okwa ti ounona vahapu okwa didilikwa tava lumbu nondjala, nonghene oikulya ei otai ke va kwafela nokukelela omafyo oo adidilikwa haa etwa kondjala. 

Ota tengeneke yo omakwafo oludi eli a indjipale, oo a kale opo e li keshe efimbo a pumbiwa. 

Omuprima minista Elijah Ngurare okwa tumbula eemhangela dokuyambulapo eeproyeka doikulya, ngaashi okuxupa eemboola domeva nokutota oikunino moshitopolwa. 

Emma Kantema, ominista youkashikekookanhu okwa hokolola nghene epangelo li li nokufila oshisho oshiwana, naunene tuu okuxwaxwameka eyandjo loipalwifa kwaava ve li momhumbwe. 

Eyandjo loikulya mOmaheke oli li momhangela yepangelo oyo tai kwafele oitopolwa aishe oyo ya dengwa koshikukuta novakalimo ovo tava lumbu nondjala. 

-matheusshitongenidavid@ gmail.com