ONGWEDIVA- Omuhikingalo omuSouth Africa Itumeleng Matome a tseyika nawa Basaka ngoka a hiki ongalo ya gwitha oyendji kiipundi “Waya Waya” okwa li uulika oshitalenti she ongulohi yOlyomakaya kehala lyomayinyanyudho lyedhina Truth House Entertainment kOngwediva. 

Basaka okwali a mwenyeke oshigwana sho shali sha gongala mengathithi, mehala lyomayinyanyudho Truth House. 

Uusiku mboka okwali wa thigi oyendji nenyanyu, taya inyenge nokuulika wo iitalenti yawo konima yoongalo ya pewa kaahikingalo aaSouth Africa.

Sho Basaka a li ayi komeho okuulika oshitalenti she nokumwenyeka, ka kwali a thigi nando omuntu gumwe a kuutumba, oshoka enyanyu olya li lya pitilila.Omuhikingalo gwaSouth Afrika Basaka okwali a nyanyudha noongalo odhindji, dhoka dha thigi Aanamibia noongalo oompe dhoka inaa uva nale.

Aalanduli oya li ya ulike enyanyu lyawo noku pandula mboka ya longekindha oshiindingili shoka.

Martin Djozee ngoka a li a thiki mehala moka konima kwali a mono komalungula kutya otaya mono aahikingalo aaSouth Africa mOngwediva, okwa ti okwali a hala okumona nomeho, ina hala okuuva.

Ta ti, aahikingalo mboka ohaye ya mono ashike kooTv, ashike Olyomakaya okweya mono koshipa.Okwa kumagidha wo aalongekindhi ya tsikile okuhiya aahikingalo yokondje yiilongo, opo pu kale pena ekwatathano ewanawa oshowo okulongathana sha.

vkaapanda@nepc.com.na