Opolifi moshitukulwa Erongo otai konakona oshibofa omo olutu lokaana kokamati le li tuwa la e kelwashi mondoloma yoimbodi ndele ina ta faduka po. Oshiningwanima osha ningwa mexuliloshivike modoolopa Swakopmund popepi sekundofikola efimbo lokomatango. 

Omupopiliko wopolifi moshitukulwa Erongo Senior Inspector Judith Shomongula okwa koleka oshiningwanima eshi. 

Opolifi oya hokolola tai ti okaana oke li tuwa komukeleli womaliko pef imbo kwa li ta ningi omapekapeko okukonakona oimbuluma posekundofikola Swakopmund opo a longele. Oshiwana otashi pulwa kwaau ena ouyelele opo shi lopotele opolifi keshe i li popepi. 

Okwa didilikwa ounona va ninga oihakanwa yokulongelwa ominyonena kooina eshi hava kupulwashi, osho shi li sha puka. 

Opolifi oya kumaida ovakainhu ngeenge va pulumuna opo va ka konge omakwafo kovaxungimwenyo osho yo okupopya kutya itava dulu okutekula ounona vavo. 

Opolifi oya ti koipangelo oku na omandiki ha ku twalwa ounona ovo ina va ha lika vali kooina. 

Oshiningwanima shikwao, olutu lomukainhu weedula 29 ole li tuwa a xulifila pomukunghulo wefuta koWalvis Bay, Omaandaxa efimbo longula. 

Okwe li tuwa komukeleli womaliko. Fiyo opapa ka pena ouyelele kutya omukainhu okwa dipawa kulyelye onghe omakonakono opolifi otaa twikile. 

fhamalwa@nepc.com.na