ONGWEDIVA- Omupopiliko welelo laNgandjera Sackeus Shangula okwa kumaida oshiwana opo shi longele kumwe okulopota ovanhu tava vake po eendongi da vakwao ndele tava kadipaa.

Okwa yelifa ta ti eendongi oda fimana molwashi oha di kwafele okupulula omapya oshoyo okukateka omeva nokunana omatemba.

Shangula okwa moshitunda shaNgandjera omwa didilikwa mu na oumbudi woondongi wa londa pombada molwashi ovanhu ove hole okulandifa ombelela yandongi.

Omwedi wa dja ko opolifi moshitukulwa shaMusati oya lopota oibofa ihapu yovanhu va kwatwa po shaashi hava vake po eendongi ndele tava ka dipaa.

Ovakwashiwana ohava kala alushe va ngudumana koitaashi yopolifi tava nyenyeta kombinga youmbudi woondongi.

Shangula okwa ti omunhu ngeenge okwa dipaa ondongi yamukwao ohava pewa ehandukilo kelelo lavo molwashi opena okatendo ka tulwa po koveta.

“Mwene wondongi ya dipawa oha pula opo a popye kutya ondongi yaye oi li pongushu i fike peni ndele ta pewa oshimaliwa,” ta ti.

Okwa weda po ta ti nakuvaka po ondongi yovanhu oha dulu okui futila po ta yandje ondongi imwepo.

“Eendongi oha di dana onghandangala ya fimana momidingonoko detu,” ta ti.

Okwa ti ovafekelwa vamwe konima ngeenge ova vake po eendongi oha di shingilwa moAngola.

“Ovanhu vamwe ohava ka landifa oondongi ve na omwenyo komikunda dokokule,” ta ti.

Okwa ti omunhu keshe tashi ngi oimuna ihe na ombapila na lopotwe kopolifi. 

“Oovene vomikunda nava kala tava yandje eembapila dokushinga oimuna kovanhu,” ta ti.

Kansela woshikandjohoololo shaTamanzi Johannes Iiyambo okwa koleka ta ti ombelewa yaye ohai lopotelwa eelopota dovanhu tava vake po eendongi davakwao.

Okwa ti ovanhu ohava shingi po eendongi da vakwao ndele tava ka landifa komikunda dokokule.

“Ombelela yandongi oi holike moshikandjohoololo shange. Ngeenge owa i keendingosho oto hange ko ovanhu tava landifa okapana kandongi mwa kwatelwa eedingu,” ta ti.

Iiyambo okwa ti ovanhu ove hole ombelela yandongi shaashi kai na omukifi wongauta.

Kansela okwa ti ovanhu vamwe ohava xupu meengeshefa davo dokulandifa okapana kandongi ile eendongi di na omwenyo.

“Ongeshefa yoondongi otai e tele ovanhu oyuuyemo. Omunhu ngeenge okwa landifa okapana kandongi oha dulu okumona mo oshimaliwa shokulanda oikulya yomeumbo,” ta ti. – fhamalwa@nepc.com.na