Lahja Nashuuta 

Omanga omalongekindho gomahogololo gaamboka taya ka kelela po iikandjohogololo noondoolopa geli taga pula komeho, aakwashigwana otaya kunkililwa opo ya yande omayipumo mumwe, pethimbo lyiigongi yopapolitika noshowo esiku lyomahogololo. 

Omahogololo giikandjohogololo noondoolopa otaga ka kala ko momasiku 26 gaNovomba 2025. 

Omwaalu gwaantu yethike poomiliyona mbali oye li yiishangitha oku ka hogolola aakalelipo naaleli miikandjo nomoondoolopa dha yooloka. 

Moshiwike shike ECN okwa pititha omushangwa-veta guna sha nomahagololo mono kwa kunkililwa aakwashigwana opo ya yande okwiipuma mumwe, noku ningilathana omatilitho no sho wo okuhanagulilathana po iinyanyangidho yanuninwa okugandja omawuyele okuza koongundu dhoopolitika dha yooloka. 

Omukuluntu goECN Peter Shaama oku pitila momushangwa nguka okwa li a tsu omuthindo kutya oku ningilathana uushadha nomatilitho nosho wo oku kondjithathana itashi tsu kumwe nokatendo okatitano koveta ndjono yina sha nomahogololo moshilongo ya tseyika nawa onga oElectoral Act, Act no 5 of 2014. 

Shaama dhika okwedhi popi sha landula omanyenyeto okuziilila koongundu dha yooloka dhono dha holola kutya opuna aantu yamwe taya ningile noku hanagula po omapalakata gooyakwawo. 

Olopota okuziilila koshitopolwa shOmusati oya holola kutya gumwe gwoshilyo shoSwapo okwa li a hanangula po noku tuulapo omapalakata goArrirmative Repositioning (AR). 

Omanga moshitopolwa shaKhomas, omukalelipo gwoPopular Democratic Movement (PDM) moshikandjohogololo shoTobias Hainyeko okwali a gandja euvo nayi sho aakwashigwana kayeshiwike ya ponokele omapalakata ge noku ga ningila omuyonena. 

“kehe omuNamibia okwa mangulukila oku gongala noku wa yimina ongundu yopolitika yehalo lye, pwaana omatilitho” Shaama ta tumbula ngaaka. 

ECN okwa tsikile ko kutya oshili oshi nakuwanithwa shoogundu dhopolitika okushilipaleka kutya iilyo yawo tayi otayi kampaininga paveta nelandulathano. 

lnashuuta@nepc.com.na