Omukainhu weedula 35 okwa tambulilwa moshipangelo shaShakati eshi vati a monifwa oshiponga komulumenhu waye e mu twa noshikulufu. 

Oshiningwanima osha ningwa Etivali komukunda Oipya moshikandjohoololo shaNgenga, moshitukulwa shaHangwena. Omupopiliko wopolifi moshitukulwa shaHangwena Warrant Simeon Haufiku okwa koleka oshiningwanima eshi. 

Opolifi oya hokolola tai ti omufekelwa weedula 40 okwa li a nangala nomukainhu waye monduda imwe. Ota ku hokololwa kutya omufekelwa oye aya keumbo lomukainhu waye. Opolifi oya hokolola tai ti efiku olo omukainhu okwa lombwela omufekelwa opo aye keumbo lavo ashike omulumenhu i na hala. Ovaholafani ava ova tameka okutanguna ndele tave li denga. Opolifi oya hokolola tai ti omufekelwa okwa kufa oshikulufu ndele tatu omukainhu waye lwoikando ya yooloka monhulo. Omulumenhu ou okwa kwatwa po tuu efiku olo nota holoka momhangu wamengestalata waShakati nena. 

Ota pangulilwa oshibofa shonghendabala yedipawo nomakonakono opolifi otaa twikile. Opolifi oya kumaida ovalumenhu opo va xulife po okuningila ovakainhu omatilifo ile ominyonena ngeenge omukainhu ta ti i na hala okuya moixulo. 

Opolifi oya ti ovalumenhu na va fimaneke oufemba wovakainhu ngeenge tava ti i na hala shaashi okuya moixulo oha ku di kehalo lomukainhu ndele haku longifa eenghono. 

fhamalwa@nepc.com.na