ONGWEDIVA- Valde Nghinamwaami okwa ti okuudite etumba okulongifa ounongo waye eshi paife ha shiki eengalo nelalakano lokuhafifa oshiwana.

Omunyasha ou okwa ti oku li a tungu momikunda ashike i na teka omukumo wokulongifa ounongo waye tashi pitile mokuimba eengalo.

Okwa ti okwa tameka okushika eengalo omudo 2016 omo kwa li hava imbi ve li vavali nakaume kaye. 

Omudo 2017, okwa ti okwa shika ongalo tai ti dilaadila nawa omo ta ti elalakano okuyandja ehongo kovanyasha nounona opo va kale tava dilaadila nawa tete noku li tula mo moilonga yavo.

“Omudo 2022 oda shika natango ongalo tai ti likeuka tete omo da yandja ehongo koshiwana kutya omunhu manga i na ninga etokolo ne li pule tete kutya omuna oshilanduli shi li ngei pi,” ta ti.

Nghinamwaami okwa twikila ta ti omudo 2024 natango okwa shika ongalo tai ti nena opapa mongula opapenya sha hala kutya omunhu okwa pumbwa okukala ta ende ta kongo ouxupilo keenhele da yooloka.

“Omudo 2025 nda pitifa natango ongalo tai ti ino tu dimbwa oku twa dja sha hala kutya ovanhu na va kale ve shi kutya ova dja peni,” ta ti.

Okwa yelifa ta ti okwa shika eengalo 46 kudja omudo a tameka.

Nghinamwaami okwa ti okwa taalela omashongo oshimaliwa unene tuu ngeenge ta kai mba keenhele da yooloka ile okufuta oilongifo.

“Omafimbo amwe oto hange ovanhu tava u lange kutya eengalo dange ka diwa ashike i na di teka omukumo,”ta ti.

Okwa patulula ta ti onghalamwenyo okutaalela omashongo a yooloka ashike eshi sha fimana okukala omunhu e na omukumo nelitulemo.

“Eengalo odo nda shika odi na omatumwalaka a fimana taa yandje ehongo, onghee osha fimana kovanyasha opo va pwilikine eengalo dange,” ta ti. 

Okwa kumaida ovanyasha opo va longife ounongo wavo molwashi otashi va kwafele oku li monena oyuuyemo.

“Okuvaka po oinima ya vakweni ka kuna elao ashike eshi sha fimana okulongifa ounongo weni,” ta ti.

-fhamalwa@nepc.com.na