Auleria Wakudumo
Omuprima woshilongo Elijah Ngurare okwa holola kutya epangelo mokupitila momutwe woshilongo Netumbo Nandi- Ndaitwah ola nyumuna oprograma ya shanakulya oshanakulonga, okukwafa oshiwana pamukalo woshimaliwa noipalwifa.
Shanakulya oshanakulonga oo omukalo wokukwafa ovanhu unene ovo veli komikunda va mone oyuuyemo mokulonga nokuyambula po omidingonoko davo vene.
Omuprima eshi okweshi holola pefimbo ta talele po ongeleka yaElcin Mupini moshitukulwa shaKavango West.
“Oprograma ohai longo ngaha, ovakwashiwana pomudingonoko ohava pew ava kwafele meeproyeka da yooloka ngaashi okutunga eepate, okukwafela noipumbiwa ngaashi okuyandja oshixupulo ile etemo voo tava pewa ofuto pashimaliwa ile oikulya,” Omuprima ta fatulula.
Ngurare okwa ti oprograma ei otai ka futa ovanhu oN$118 mefiku ngeenge va longa.
Okwa holola kutya elalakano nashanakulya oshanakulonga okukwafela ovanhu va mone oyuuyemo omanga tava yambula po exumokomesho momidingonoko davo.
“Pamukalo ou, ovanhu otava yambula po eenghalo davo, tava mono oyuuyemo, okukwafela oproyeka dexumokomesho momidingonoko ngaashi eefikola, eepate, omeva, nakeshe shimwe tashi tungwa pomudingonoko,” Ngurare ta ti ngaho.
Ngurare okwa ti omudingonoko waMupini moKavango West oo umwe tau ka mona omauwa oprograma yashanakulya oshanakulonga.
Oprograma oyili omukalo wepangelo okukwafela oshiwana, tashi ningwa mokuyandja oilonga nokumona oyuuyemo omanga yoo ovanhu tava yambula po omidingonoko davo.
Metalelepo laye, omuprima okwa yandja oN$3 000 kofikola yosoondaxa yaMupini. Okwa kumaida ounona op ova fimaneke oshipango oshitinhe, okudulika nokufimaneka ovakulunhu.
Okwe va dimbulukifa kutya ovo ovaleli vokomongula novena okukala vena oshisho shonakudiwa.
Ngurare okwa holola yoo kutya ombelelwa yaye oya shangela omalelo opamufyuululwakalo, mwa kwatelwa laMupini opo va yandje edu lokumboola emboola domeva opo va kufe po enhota moshiwana novakwashiwana va hovele oukunino vokonima yomaumbo avo.
Omuprima okwa ti enota momudingonoko waMupini otali la tulwa kekaku shaashi otava ka mona omunino womeva weekilometa 100 okudja koRundu fiyo okoNkurenkuru.
-wakudumoauleria@gmail.com