Omukulupe weedula 70 womulumenhu okwa kanifa oshimaliwa shaye shi fike omaN$47960 konima eshi a tulwa mokatoo okupitila kongodi yaye. 

Oshiningwanima osha ningwa Omaandaxa koshitukulwa shaKunene. Omupopiliko wopolifi moshitukulwa shaKunene Warrant Kristofin Hamunyela okwa koleka oshiningwanima eshi. 

Opolifi oya hokolola tai ti omukulupe okwa dengelwa ongodi komulumenhu ta popi kutya ota denge okudilila kehangano loSocial Security mboli oipupulu. 

Otaku hokololwa kutya kalyamupombo ou okwa pula omukulupe opo a yandje enomola daye dombaanga. Kalyamupombo ou okwa lombwela omukulupe kutya okwa yandje eenomola daye dombaanga ota tuminwa oshimaliwa. Omukulupe vati okwa dimina ndele ta yandje eenomola domavalulilo ombaanga yaye. Opolifi oya hokolola tai ti konima yokafimbo oshimaliwa osha lopota sha dja ko kombaanga yaye. 

Fiyo opapa oshimaliwa i na shi monika nomakonakono opolifi otaa twikile. Ka pena ouyelele kutya omufekelwa ou lyelye. 

Efimbo keshe opolifi otai kumaida oshiwana opo shi ha yandje vali eenomola davo domavalulilo eembanga kovanhu vehe shi molwashi paife ookalyamupombo voku kengelela ovanhu ova ninga vahapu. Okwa didilikwa ovakulupe ovo kwa li ve li ovanashilonga va ninga oihakanwa yokunyekwa oshimaliwa shavo tashi pitile pamukalo wokatoo kokongodi. 

Oshiwana osha kumaidwa opo shi xulife po okuya meenghundafana novanhu vehe va shi unene tuu ngeenge tava di keembanga. 

“Omunhu ngeenge okwe ku dengele te ku pula ouyelele u na sha neembaanga doye dima ko kongodi yoye shaashi oto tulwa mokatoo,” opolifi tai ti. 

fhamalwa@nepc.com.na