Auleria Wakudumo

Omukulunhuwiliki woshiputudilo shoUnam Kenneth Matengu okwa holola kutya oshiputudilo ihashi shunifa ko ovahongwa vondodo onhi-11 ngaashi vahapu va itavela. Ovahongwa vondodo ei ohava tambulwa meeprograma dokulihongela odiploma moUnam. 

Eshi omukulunhuwiliki okwe shi holola meenghundwa nokakomitiye komutumba wopashiwana oko haka ungaunga nehongo. 

Vahapu ova itavela kutya Unam iha tambula ovahongwa vondodo onhi-11 nande nande, oshiputudilo osha fatulula nokuyelifa aishe ei. 

“Ovahongwa ava ohava tambulwa meeprograma odo da wapalela ondjapo yondodo onhi-11 she likolelela koNational Qualifications Framework (NQF). Omulandu wo-NQF otau ti omuhongwa oo e na odjapo yondodo 11, hai ifanwa o-NSSCO ota dulu okulihongela odiploma omanga omuhongwa e na odjapo yondodo 12 (AS) ta tambulilwa moprograma yodegree,” Matengu ta fatulula ngaho. 

 “Okwa ti okupitika ovahongwa vondodo onhi-11 meeprograma dodegree otashi shunifa pedu ongushu yehongo. Nande ongaho, ovahongwa ava ova tambulwa ko okulihongela odiploma moUnam,” Matengu ta ti. 

Olopota yokakomitiye oya yelifa nokufatulula kutya ovahongwa vondodo onhi-11 otava dulu okuya koiputudilo yopombada. 

Ova ti eshi osha eta engwangwano lakula moshiwana, nosha fiya ovadali novahongwa vahapu va limbililwa kutya nava kufe onghatu yehongo lopombada ilipi. 

Unam okwa ti okwe ya po noprograma hai ifanwa obridging oyo hai kwafele ovahongwa ovo inava mona omhito yokuya koAdvanced Subsidiary (AS). Ovahongwa ohave lihongo oule wodula moprograma ei. 

“Oprograma ei ohai yandje omhito kovahongwa opo va twikile nodiploma ile odegree ngeenge va mane. Nande ongaho, oprograma inai tulwa moilonga aishe shaashi kape na oshimaliwa,” Matengu ta holola ngaho. 

Ehangano loNamibia Students Financial Assistance Fund (NSFAF) ihali futile eeprograma dovahongwa ovo tave li wedeleko ngaashi oprograma ei Unam a hala okutula moilonga molwaashi oha pula oitwa 25 moihongwa itano oyo ovo tave liwedele ko vehe na. 

Epukululohongo la nghundipala

Okakomitiye oka didilika kutya elihongo loilongwa itai tu kumwe meefikola ohaku eta ovahongwa vahapu va ka kufe omaifano a puka koiputudilo yopombada. 

Ovahongwa vamwe ohava kufa exwata loilongwa ya puka mofikola osho hashi va imbi okuhoolola omaifano avo ngaashi okulihongela ouhahende, oundokotola ile eeprograma doudindoli. 

Unam okwa ti ota ka longela kumwe neefikola opo va kwafele okutula kumwe oihongwa yovahongwa mofikola. Matengu okwa ti ehongo la tya ngaha ola pumbwa okutameka peengudu dopedu ngaashi mondodo onhiheyali opo ku kwafelwe ovahongwa va hoolole oihongwa i li mondjila. 

Okakomitiye oka holola kutya ouministeli wehongo naUnam ova pumbwa okulongela kumwe opo va kufe ovanhu mengwangwano omo ve va tula. Ova ti ngeenge kape na eudafano la kola pokati kavo, ovahongwa vondodo onhi-11 vahapu otava twikile okukala ve udite kutya ova tetwa ko kehongo shihe li pamulandu. 

Matengu okwa ti Unam ota twikile okutula oshiwana komesho mehongo. 

 “Ovahongwa vondodo onhi-11 ohava tambulwa moUnam, ve lihongele odjapo yodiploma,” ta yelifa lwaxuuninwa. 

-wakudumoauleria@gmail.com