OMPUNDJA-Opate ya dja mOshakati ya uka kOmpundja otai ka longwa okutulwa oteya, onghee oshiwana shopomudingonoko ou itashi ka mona vali oixuna yokuhe na opate yoshinanena.
Minista woyeendifo noilonga Veiko Nekundi okwa patulula oilonga pambelewa yokulonga opate ei Etitano.
Okwa dididlikwa oshiwana shopomudingoloko Ompundja hashi nyenyeta unene kombinga yonghalo yopate ii oyo ya dja mOshakati fiyo okOmpundja.
Okwa ti epangelo otali longo noudinini okukandula po oupyakadi weepate dii unene tuu koshitukulwa shaHangwena, Oshikoto nOshana nosho tuu.
“Osha fimana ngeenge oshiwana shi na eepate doshinanena molwaashi otashi kwafele okuyambula po eliko loshilongo tashi pitile momangeshefelo,” ta ti.
Okwa yelifa ta ti ngeenge ope na eepate diwa nena otashi nana ovanhu okuninga po eefitola osho yo omahangano omangeshefelo.
“Eepate oda fimana kovanafikola opo va dule okuya kofikola noupu shaashi otwa didilika eefikola dimwe hadi kala da dingonokwa komeva,” ta ti.
Minista okwa ti ovanhu ngeenge tava i koshipangelo itava ka mona vali oixuna okukala tava ende molwaashi paife ngeenge opate ei oya pu okulonga otai ka eta po omhito yeetaksi doulefa.
“Paife ovanhu otava ka felefula pokati kOshakati nOmpundja. Ei onghunda iwa koshiwana,” ta ti.
Minista okwa pula oshiwana opo shi longele kumwe novanailonga tava longo opate molwaashi otashi kwafele oilonga i kale tai longwa pefimbo.
“Inamu vaka po nande oilongifo yovanailonga tava longo opate shaashi otamu shunifa oilonga monima,”ta ti.
Natango Etitano, minista Nekundi okwa patulula pambwelewa oilonga yokulonga opate ya dja komukunda Uushake moshitukulwa shaHangwena ya uka koshikandjohoololo Okankolo moshitukulwa shaShikoto.
“Oshi li oshinakuwanifa shouministeli wange okukwashilipaleke kutya eepate oda longwa koitukulwa ya yooloka,” ta ti.
Natango tuu Etitano, Nekundi okwa patulula pambelewa opate ya dja kEngoyi ya uka kOmuntele.
Opate ei paife oya pwa okulonga eshi ya tulwa oteya.
Pefimbo lopate tai patululwa oshiwana osha pandula epangelo eshi tali longo nelitulemo okweeta omayakulo popepi.