Auleria Wakudumo
Odoolopa yaShikuku moshitukulwa shaMusati oya patulula pambelewa osenda yomufyuululwakalo neenghulunghedi Etitano osho yo okutumbaleka ovakwashiwana vatano mokulukilwa omalukanda.
Onhele oya patululwa komupeduminista weyambulepo ledoolopa nomikunda Evelyn !Nawases-Taeyele oo a holola kutya oshinima eshi osha fimana modoolopa nomokati koshiwana.
“Onhele ei otai tu dimbulukifa kutya ofye oolyelye osho yo odiililo yetu nelongelokumwe ongovanhu Ovanamibia,” ta holola ngaho.
!Nawases-Taeyele okwa holola kutya epangelo otali twikile okukwafa omalelo opamufyuululwakalo mokukwatela po eenghulunghedi doshilongo nokuxwaxwameka exumokomesho momikunda.
Omupeduminista okwa ti monhele ipe omu na onhele yokutelekela (epata), onhele yokuyofela ombelela, onhele yokuyowa, eeduda dokunangala, neenhele dikwao da wedwa po.
“Osenda ei otai yandje omhito iwa kovakwashiwana opo ve lihonge,va hangane nokutyapula omufyuululwakalo neenghulunghedi davo. Ondi na etimaumbwile kutya osenda ei otai ka yandja eemhito diwa kovanyasha opo va kufe ombinga meenghundafana deenghulunghedi domifyuululwakalo detu,” ta holola ngaho.
Efiku olo tuu olo,!Nawases-Taeyele okwa patulula pambelewa omalukanda atano mOshikuku. Omalukanda okwa lukilwa oohandimwe ovo va dana onghadangala momudingonoko waShikuku nomoshilongo ashishe koonono.
Ovo va lukilwa omalukanda ovo: Bonifatius Haushiku, Father Gerhard Heimrikx, Antonius Nashenda,Tweeni Ankama naNangolo Leonard Mukwiilonga.
Mayola wodoolopa yaShikuku, Julia Endjambi okwa holola kutya osenda ei otai hongo, tai yandje omahokololo nokukaleka po omufyuululwakalo.
“Ohatu shivifile ovanyanyamaulu op ova shiive omidi domifyuululwakalo davo nokudi yambula po nexwumokomesho lonena,” Endjambi ta ti.
Mayola okwa holola yo kutya odoolopa oya lukila ovanhu ovo va va dana ombinga meyambulepo lodoolopa yaShikuku. Okwa ti oku va lukila omalukanda, odoolopa otai kwashilipaleke kutya otava kala nokudimbulukwa fiyo alushe.