Opolisi yaNamibia oya lopota oshiningwanima shimwe shi nyanyaleka sho omulumentu gwetanga lyegameno gwomimvo 33 a yaha kuume ke komiihole gwomimvo 34 okusa, e ta ehameka omulumentu gumwe omanga inaa ikutha omwenyo mwene. 

Sha ikolela komugandji gomauyelele muuministeli wetanga lyegameno Petrus Shilumbu, oshiningwanima shoka osha holoka Omaandaha, kOkahandja moshitopolwa hogololo Otjozondjupa. 

Shilumbu okwa lombwele oshifokundaneki shika kutya ke na natango uuyelele wothaathaa kombinga yoshiningwanima shoka, onkene ita vulu okutsikila ko. 

Otaku hokololwa kutya omulumentu ngoka oshilyo shetanga lyegameno, a i tango a yaha omulumentu gumwe ngoka taku fekelwa kutya osuwala she, e ta yaha kuume ke komiihole, ngoka naye a li oshilyo shetanga lyegameno, nokonima okwi iyaha mwene. 

Opolisi oya hokolola kutya ookuume komiihole mboka oya hulitha, ashike omulumentu ngoka a yahwa tango oku li ta mono uuhaku koshipangelo. 

Otaku hokololwa kutya omukiintu ngoka okwa li a yahwa iikando oyindji omanga omuholike gwe inaa itula oholo ye mwene. 

Oonaakusa oya tseyika nomadhina Justine Metumo Nelenge osho wo Abner Shilemba. 

Opolisi oya kala nokukumagidha oshigwana shi kale aluhe tashi pula omakumagidho nomagwedhelwepo uuna sha iyadha sha taalela uupyakadhi. 

Tayi ti, okukutha etokolo lya puka ihashi kandula po uupyakadhi, ihe ohashi wu gwedhele ashike. 

Epangelo olyina aahungimwenyo muuministeli wa yooloka mboka kehe thimbo yi ilongekidha okuyakula oshigwana. 

Omuhungimwenyo moshipangelo shaShakati Victoria Hauwanga okwa popile kutya, okukelela okuvule okupanga, onkene ngele omuntu oku na uudhigu o sh iwanawa okut h ika paahungimwenyo, opo a kwathelwe. 

-vkaapanda@nepc.com.na