OSHAKATI – Aanyasha oyendji miitopolwa yokonooli oya kala nokwiigandja kongundu tayi pangele Swapo kiigongi yokuhwahwameka omahogololo ge li ko omwedhi nguka gookansela yiitopolwa osho wo yoondoolopa. 

Yamwe mboka ya kala nokukwatela komeho oongundu dhoompilamena oya popi kutya oya kala nokukuta aantu, ihe nena oye galula ko sho ya dhimbulula ondjila yomondjila. 

Shikalepo Andreas ngoka a li oshilyo shoIndependent Patriots for Change (IPC) koshigongi shoka sha li mehuliloshiwike kOmatando mOngwediva okwa gandja ombili kOmupresidente Netumbo Nandi- Ndaitwah osho wo kongundu yoSwapo sho anuwa a kala noku yi popila muuwinayi, a landula ondjila ya puka. 

“Onda hala okugandja ombili oshoka onda kala handi popi nayi ongundu yoSwapo nonda hala ndi taambwe ko ongokanona kongundu Swapo,” ta indile ngaaka. 

Esiku ndyoka Andreas okwa kumagidha aanyasha aakwawo ya landule ongundu ndjoka ta ti oyi li moshili, ano oSwapo. 

Maria Shivute koshigongi kOgongo shoka sha li ko petameko lyomwedhi, ngoka a li a landula ongundu yoNamibia Economic Freedom Fighters (NEFF) okwa ti okwa pukuluka oshoka okwa li i ikanitha mwene. 

Ta gwedha po kutya oongundu dhilwe dhoompilameno otadhi gandja omawuvaneko giifundja oshoka odha hala ashike oku ka lya. “Natu yeni mehwata tu ka hogololeni aaleli yoshili momasiku 26 gaNovomba,’’ ta kumagidha ngaaka. 

Thomas Ndjoba ngoka a li poshigongi shoSwapo kOshaandja moshitopolwa shaShana mehuliloshiwike okwa ti okwa shuna koSwapo oshoka okwa mono kutya oku na uuyelele. 

“Aaleli mboka ye li ko paife otaya gandja omukumo, nonkene nda dhenge ondalaye,” ta popi ngaaka. 

Esiku kwa li kwa ningwa oshigongi oshinene shoSwapo kEngela petameko lyomwedhi nguka, Omupresidente Netumbo Nandi-Ndaitwah okwa popi kutya ombili ohayi panga, onkene okwa taamba ko ombili ndjoka ya gandjwa kwaayehe ya shuna koSwapo. 

“Otandi pandula kehe gumwe a galukile kongundu Swapo nena, ondu uvite nawa lela. Okuza nena indeni mu ka longe mwa itula mo e tamu uvitha ko oshigwana shi ka hogolole ongundu yi li mondjila yoSwapo,’’ ta kumagidha ngaaka. 

Amushangandjayi gwoSwapo Sofia Shaningwa okwa pandula ayehe ya li yi igandja, omanga ta pewa uukalata wuukwashilyo woongundu hoka ya zi. 

“Uukalata mbuka otandi ke wu gandja kooyene. Naamboka inamu wu eta natango, inamu wu tuula po nenge mu wu ekelehi, ihe wu gandjeni nombili,’’ ta kumagidha ngaaka. 

Shaningwa okwa ti, kehe ngoka natango a landula ondjila ya puka, inaku toka natango okugalukila kegumbo. Ta kumagidha oshigwana kutya momasiku 26 gaNovomba, oshigwana nashi ka hogolole mondjila, inashi hepeka nando ombapila yimwe sho nashi shange nawa. 

-vkaapanda@nepc.com.na