EPEMBE- Minista wehongo, omaudano, ovanyasha noungoba, Sanet Steenkamp okwa patulula pambelewa eengulufikola 20, odo da tungwa keefikola nhano moshitukulwa shaHangwena.
Eengulufikola oda patululwa pambelewa Etitatu, adishe oda tungwa di li pongushu yoshimaliwa eemiliona N$8.
Ofikola keshe oya tungilwa eengulufikola nee neenduda dokutuvikila.
Eefikola odo Shakela Shimbwa Junior Primary, Ohamalila Primary, Mateus Nakatumbe Primary, Festus Ikanda Primary osho yo Ohamaala Primary.
Moshipopiwa shaye pefimbo kwa li e li kofikola Shakela Shimbwa Junior Primary School, minista okwa ti, epangelo ota li twikile okulonga noudinini okutungila eefikola eengulu dokulongela ovanafikola.
Okwa ti, eefikola odo da tungilwa eengulu otadi ka longifwa ashike keendodo dopetameko shaashi okwa didilikwa ounona kwa li hava longelwa momatala a dikwa noiti.
Steenkamp okwa tambulaka ovahongifikola hava longele komikunda ta ti, ohava ende meepate dii tava i keefikola okukalonga ounona. “Kashipu okuenda momafululu momifitu. Ovahongifikola ova fimana molwashi ove na oshisho nokaana okaNamibia okukala ka mona ehongo,” minista ta ti. Okwa kumaida ovadali opo va fimaneke ovahongifikola osho yo okukala ve na oukumwe nelongelokumwe.
“Ovahongifikola navo ovanhu ashike ngaashi naana ovanhu aveshe,” minista a weda po. Minista okwa pandula ovadali eshi hava longo noukumwe okuningila ovanafikola omatala okulongelwa.
“Ovadali ota mu longo noudjungu okushakeneka epangelo ondjilakati. Twikile noshilonga eshi shiwa,” ta ti.
Steenkamp okwa ti, okwa longela eedula hetatu moshitukulwa shaHangwena omo a li omupeduwiliki wehongo fiyo taka ninga omukulunhuwiliki wehongo.
Omupeduwiliki wehongo moshitukulwa shaHangwena Palisha Ngulu okwa lombwela minista ta ti, oshitukulwa oshi na eebashu dihapu da ningwa eengulufikola osho shi li eshongo linene. Okwa pandula ouministeli wehongo eshi tau twikile okutungila ovanafikola eengulu no nande natango pena eefikola dimwe di na ovanafikola tava longelwa meembashu. Ofikola Oshakela Shimbwa Junoir Primary oi li momukunda Ombaba moshikandjohoololo shaPembe, moshitukulwa shaHangwena.
-fhamalwa@nepc.com.na