Auleria Wakudumo
Oule wefimbo, ovashingi mwa kwatelwa ovatwaalelwa mOndangwa, ova kala nokukondjela ovatwaalelwa vavo momumbwalangandjo.
Vamwe ohava kondjele ovatwaalelwa fiyo omopate, osho sha nyika oshiponga kuvo aveshe osho yo kovashingi vakwawo ovo tava di keembinga da yooloka.
Elelo lodoolopa yaNdangwa ola uda onghuwo yoshiwana shavo nova tokola okutunga onhele yokuninga omakwatafano e li xwepo pokati kovatwaalelwa novashingi.
Omupopiliko welelo lodoolopa, Petrina Shitalangaho-Mutikisha okwa holola kutya elelo otali ka tunga onhele ei pomatala haa ufanwa ABC.
“Onhele ei otai ka kwafa ovashingi novatwaalelwa va uka kEenhana, Grootfontein, Tsumeb osho yo Gobabis. Monhele omu ota mu ka kala oundjuwo, onhele yokulondekela ovatwaalelwa, omudile wovatwaalelwa, onhele ei otai ka kala ili melandulafano noyaamena ovashingi aveshe novatwaleelwa,” Shitalangaho-Mutikisha ta holola ngaho. Omupopiliko welelo okwa ti, ova ya moshiwana, okupula ovashingi novatwaalelwa kombinga yedilaadilo eli nova li va pandula elelo lodoolopa eshi leva kufa oudjuu komapepe avo.
Ovakwashiwana ova holola kutya ova fimaneka omatokolo aeshe a ningwa kelelo lodoolopa.
Ova pula elelo opo li wedele ko kashona unene konhele yomukweyo wovatwaalelwa oshoyo ponhele opo tapa kala oihauto.
“Molwaashi elelo lodoolopa letu ola fimaneka omaliudo nomawedele po oshiwana, eshi ovakwashiwana va holola otashi ka tulwa moilonga nokuwedelwa komangela oyo ili po nale. Onhele ei oya teelelwa i ka kale ya pwa muFebruali 2026,” Omupopiliko welelo ta ti.
Mopaife, ovashingi novatwaalelwa oveli ashike momuti umwe uli popepi nomatala oABC.
Apa, ovashingi oveli po ashike tava tondoauka mopate, tava yakana ovatwaalelwa.
Eshi ohashi kala shanyika oshiponga kovatwaalelwa shaashi efimbo limwe oto dulu okukanifa oinima yoye mokukondjelwa. Ekondjelafano fiyo omopate ohali eta yoo engwangwano movashingi vakwao ovo tava longifa opate. Onhele yomatulikilo mOndangwa, otai ka eta elunduluko, elandulafano neameno novashingi ashike unenenene movatwaalelwa.