Taimi Haihambo
Omuhongi umwe wokofikola yedina Dr. Chief Samuel Ankama, oo a pulwa aha tumbulwe kedina okwa ti, nghee ve lixulile okupewa obush allowance, oimaliwa hai pewa ovahongi ava hava longo mokuti ye lixwa po kepangelo mo2016.
Okwa ti, epangelo ola tula po omulandu kutya ovahongi ava ve li keenhele domaushai nava kale hava futwa ngeno oN$1 750, shaashi ohava longele mokuti, ashike vokoDr. Chief Samuel Ankama ohava mono ashike oN$750.
“Otwa ninga onghendabala yokuya keembelewa dakula dehongo moshitukulwa opo tu ka yandje omanyenyto etu, ashike otwa lombwelwa kutya ofikola yetu oya tumhakanifwa nolodge i li popepi nOshakati, oyo i na edina la faafana nofikola yetu,” ta ti.
Vati etumhakano olo, ola eta va kale hava futwa ashike oN$750, shaashi vati olodge oi li popepi nOshakati.
“Oupyakadi ou li nee apa kutya, fye ofikola yetu oi li kokule, kombinga ei yokOponona, oko ku li mokuti,” omuhongi ta ti.
Okwa ti vo pefimbo lodula ohava mono oixuna shaashi efundja ohali kala la pimbila vo vati ove li popepi nomulonga, Ontako. “Ngeenge omeva okwa pimbile, ope na ngaho okawato aka haka yelula ovanhu opo va dule okutauluka omulonga vaye kodoolopa, ndele haalushe hake ya,” ta ti. Vati kombinga yoyeendifo koima ihaku i outuwa vashona. Ohaku i ashike eetuwa dakula.
Omukulunhu wehongo moshitukulwa shaShana Paulina Shapumba okwa ti, ouyelele owa fika mombelelwa yaye. “Ashike nande ongaho ombelelwa yange hayo i na oshinakuwanifa shokufuta ovahongi eebush allowance, ombelewa yomulipilaminista oyo i na oshinakuwanifa osho. Ashike ondi shi shi kutya ombelewa yomupilmaminista oya li ya ka ninga omapeekapeko pofikola opo, osho yo peefikola dikwawo di li monghalo ya faafana,” ta ti.
Okwa weda po kutya ombelewa yomupilimaminista oye lipyakidila nokuungaunga noshikumungu osho.