OSHAKATI – Aakuluntu yopolisi kiitopolwa yokonooli oya indile oshigwana shi kale sha ngungumana noshi na ombili pethimbo lyomahogololo. 

Aanamibia otaya ka hogolola mEtitatu momahogolololo gookansela yiitopolwa osho wo yomalelo goondoolopa. 

Aakuluntu yopolisi oya dhimbulukitha wo Aanamibia kutya kape na ondingosho tayi ka patuluka mEtitatu. 

Aakuluntu yopolisi yiitopolwa Oshana, Omusati, Oshikoto osho wo Ohangwena oya ti opolisi itayi ki idhidhimikila nando omayihumbatonayi pethimbo lyomahogololo. 

“Opolisi yaNamibia otayi pula Aanamibia yi ihumbate nawa yo yi ikaleke kokule nokutsitsimika aantu pethimbo ndika lya simana lyomahogololo gookansela yiikandjohogololo nomalelo goondoolopa nokuya wo monakuyiwa,” taya popi ngaaka. 

Aakuluntu yopolisi konooli oya popi kutya Namibia osho ashike oshilongo ye na onkene oya pumbwa oku shi gamena pamukalo gwokukala nombili noku iyutha kooveta. 

Tay pula kondandalunde oongundu dhopolitika dhi kwatele komeho aayambidhidhi dhawo mwaayihe,” taya ti ngaaka. 

Oya gwedhwa ko kutya aakwashigwana ayehe naya kale ye shi okatendo 21 (1) d kekotampango lyaNamibia, hoka taka gandja uuthemba aantu ya gongale nombili, yaa na iilwitho, uuthemba mboka nawu kalekwe po pamukalo ngoka itaagu pitilile waantu yalwe. 

Onkene aahogololi ayehe otaya indilwa yaa zale omizalo dhoongundu dhawo nenge ye na omandhindhiliko taga ulike kombinga hoka ya gama. 

“Omaihumbato omawinayi pethimbo lyomahogololo nokonima yomahogololo itaga ka idhidhimikilwa,” ya ti ngaaka. 

-vkaapanda@nepc.com.na