ONGWEDIVA – Ouministeli wehongo, eenghulunghedi, omaungoba, ovanyasha nomaudano otau pula ovanhu ovo ve na ounongo wopamifyuululwakalo wokupanga ovanhu va lika komayoka, va dengwa kokashelu osho yo eemwengu opo ve lishangife keembelewa dookaansela.
Edi oda kolekwa komunambelewa ta longele meembelewa dehongo moshitukulwa shaHangwena, Mateus Iitula ta longele koshikondo sheenghulunghedi nomifyuululwakalo mounisteli wehongo.
Okwa yelifa ta ti novanhu ovo hava yakula omukota ova teelelika okukala ve lishangifa.
Meenghundafana va ninga naKundana onghela, okwa hokolola ta ti ovanhu otava dulu okulishangifa keembelewa dookaansela moshikandjohoololo keshe.
“Ookaansela ova tameka nale okushivifila oshiwana meeradio tava pula ovanhu opo ve ke lishangife keembelewa davo,” ta ti.
Iitula okwa yelifa ta ti, elalakano lokupula oshiwana shi ke lishangife opo ouministeli wavo u kale wa didilika ovanhu hava pange omikifi, unene tuu ngeenge omunhu a lika keyoka.
Okwa ti ovanhu ava navo ohava kwafele okuxupifa eeemwenyo davakwawo momikunda tava longifa omukalo dopamifyuululwakalo.
“Otwa hala ovanhu ovo va kale va shivika moshiwana momidingonoko davo opo nande omongula pe na omunhu a pumbwa ekwafo lavo ove shivike moshiwana kutya ohava di peni,” ta ti.
Okwa weda po ta ti osha fimana opo oshiwana momikunda davo di kale di shi kutya omu na oolyelye hava pange omikifi tava longifa omikalo wopamifyuululwakalo.
Iitula okwa yelifa ta ti ovanhu itava ka pewa omikanda dokupanga ashike eshi sha fimana otava ka didilikwa nokukala ve shivike.
“Konima ngeenge otwa mane okushanga omadina ovanhu ohatu ka tameka okuninga oshikonga shokuyandja ehongo moshiwana opo shi kale tashi ka konga omakwafo kovanhu hava pange omikifi edi,” ta ti.
Okwa ti onghela ova tameka nale koshikandjohoololo shaNgenga okushanga omadina ovanhu.
“Nena otu li moshikandjohoololo shaNgela omanga mEtine otu li koshikandjohoololo shaNdola,” ta ti.
Iitula okwa ti omalishangifo aa otaa ningwa koitukulwa aishe moshilongo ashike paife ova tameka manga noshitukulwa shaHangwena.
-fhamalwa@nepc.com.na