Wokusika ko 24 kuna paruka kokambumburu aka koCorona modoropa zaBaye, yimo ngoso ana kutanta ministera goukanguki nomundjewandjewa Kalumbi Shangula yimo katente ngoso nkera omu sirongo simpe kasikere novantu kavagwene nokambumburu wokusika ko 68.
Omu yina kara asi 60 navenye womoWalvisBay, ava ntazimwe womoVenduka ano moKeetmanshoop ntani Swakopmund awo gumwe ngoso.
Eyi kuna kuretesa nye sivaro sovantu ava vana gwana noka,mbumburu vasike ko 1 843, omu muna kara asi 101 yiyo nye vana paruka kokambumburu aka, ano ava nye vadogoroka kuna sikinye ko ntantatu. Engela ntani Swakopmund nawo vamwe vagwana ava vana parukako ano ngesi kuna kara nye novantu wokusika ko 1734 simpe kuna kuvera. Sihorokwa somoKeetmanshoop kuna kara asi mugara gonomvhura 31, govharerwa zaSuid Afrika ntani musingi goroli, ogu gawiza moNamibia kupitira poAriamslei momazuva 18 July. Age kwamukona konene mo 21 July, ano ngesi age gaza kosirongo sawo koSuid Afrika momazuva 22 July.
Ano sihorokwa somoVenduka kuna kara somugara gonomvhura 68, ogu vakonderere mosipangero sepangero moCentral Hospital, omu gazire mositewiro mo 9 July, makura kumwe nokumudumbura. Mo 24 July, Shangula katente asi mugara ogo yipo nye gazire mwene kosipangero sopaumwene noyidimbwiliso yina kulikida asi ntudi covid -19 makura yiyo vamukonderere morwa age kwakere asi kuna kuvera unene. Makura tava mukunakona yitundwamo yakawiza asi hawe kuna kara nokambumburu. Ano sihorokwa simwe somoVenduka kuna kara mugara gonomvhura 38, muposi, ogu ana kara asi kwagwanekera nagumwe ogu vagwana nare uvera ou. Gokukwamako kuna kara mukadi arugana kombanga gonomvhura 23. Shangukla katente asi age kapi ana diva asi gagwanekera nomuntu nkenye ana kuvera uvera owo, ntani age kapi gapwaga moVenduka sinkwa ntani. Nye age gakakere posilika segwaneso, opo pwakakere gumwe gwawo gatundire ko doropa zefuta. Age kwalikidire asi ana kara nokambumburu aka apa nye gakasikire mwene kosipangero kumwe nokumukonakona mo 23 July. Age kapi gaza kohambo oku vana kutura vantu wouvera ou yimo ana kutanta.
Ano ogu gumwe gonomvhura 29, mukakadi gatunga moVenduka, ogu ana kara asi kapi gagenda rumwe kopeke, ntani kapi gagwanekere nagumwe ogu ana kara nokambumburu aka. Age kwamukonakonene mo 23 July, morwa kwamonekere asi kuna kulikida kambumbura aka asi nako ana kara. Moomo hena gonomvhura 26 mukadi nage gumwe mutungimo moVenduka mosipangero sepangerosaKatutura omu vamudumbwire mo24 July. Ano mo 25 July, yipo nye gazire mwene kosipangero sopaumwene, omu gatente asi kuna kumoneka ngwendi ana kara nokambumburu aka ko Covid-19.
Age nage gumwe ana kara asi kwagwanekera nagumwe ogu vagwana nare kambumburuy aka. Gonomvhura 48, mutungimo moVenduka, mugara, ogu galitwere mwene morwa kuna kumoneka asi ntudi ana kara nokambumburu aka koCoved-19, age kwamukonakonene mo 25 July, kumwe nye nokumugwana asi ana kara nokambumburu aka.
Age nage gumwe gagwanekera n ogu vagwana nare kambumburu aka. Shangula kazeresere asi yitundwamo eyi kavageve mosondaha, kapisi yomo Hardap, omu kavatente asi gonomvhura 13 gomiomukunda gwina. Munona ogo kavamukona konene poopo tupu oguhwe kavayavadigwire vatunde koBaye nokuyatarerapo ekoro lyawo. – anakale@nepc.com.na