OUTAPI – Esiku lyomahogololo olya nyanyudha aakalimo yomiiitopolwa ya yooloka moshilongo sho ya kwata ondjuhwa komulungu Etitatu, ya ningi omikweyo ya li ya tegelela okuhogolola.
Aanambelewa yomahogololo mboka ya li ya yi moonkundathana noshifokundaneki shika oya ti inaya mona uupyakadhi washa pomahala gawo.
Aakulupe naanyasha oya li ya holola nkene yu uvite nawa sho ya hogolola, yamwe oya li ya hala ngeno oya mana nale.
Ngoloneya gwoshitopolwa shaMusati Immanuel Shikongo oye a li gwotango okuhogolola pehala lyelelo lyopamuthigululwakalo lyaMbalantu moshitopolwa shaMusati.
“Onda penduka ongula opo ndi hogolole, opo ndi gandje wo oshiholelwa oshiwanawa koshigwana shi ye mengathithi shi ninge shoka shi li mondjila,” ta ti ngaaka. Ngoloneya okwa li a ithana nokukumagidha aakalimo ya ninge shoka shi li mondjila.
Ta ti okuhogolola etokolo lyomondjila onkene oshigwana otashi ningi nawa sho tashi ulike esimano lyuuthemba wawo okupitila mokuhogolola.
“Ongula shili ihe omikweyo odhu udha oshigwana, shoka tashi holola kutya oshigwana oshu uviteko uuthemba wawo oshowo kutya omahogololo otaga ti ngiini,” ta pandula aakalimo.
Shikongo okwa ti, oya tegelela iizemo nena.
Omukulunutu gwopolisi moshitopolwa shaMusati Ismael Basson okwa ti moshitopolwa inamu lopotwa sha sha puka sigo ethimbo ndyoka a li moonkundathana nomutoolinkundana nguka.
“Sigo oompaka aakalimo oya ihumbata nawa shoka tashi nyanyudha, nondi na omukumo kutya otashi tsikile nombepo ndjoka ombwaanawa,” ta popi ngaaka. Maria Shivute gokOshifo, moshikandjohogololo shaRuacana okwa ti okwa meneka po04h30 nelalakano lyokuhogolola mbala ye a shune kegumbo.
Ta ti, oku uvite nawa oshoka omukweyo okwa li tagu endelele naanambelewa oya li taya yakula nawa oshigwana.
“Inandi tsakaneka po nando uupyakandi washa. Otu uvite komahala gamwe aantu ya thikama omanga ye li momikweyo ihe tse otwa kuutumba,” ta popi ngaaka. Mbatjua Mbamuna omukalimo gwomoRuacana okwa ti ye okwa hogolola oshoka oku uvite kutya omahogololo otaga ti ngiini.
“Kashi na kutya oto hogolola ongundu yini shoka shi li mondjila oshoka kutya owa hogolola opo ewi lyoye lyi yalulwe,” ta ti ngaaka.
Mbamuna okwa kumagidha mboka inaaya hala okuhogolola kutya naya lundulule omatokolo ngoka ga puka e taya kala taya ningi shoka shi li mondjila omolwuuwanawa woshilongo.
-vkaapanda@nepc.com.na