Ethimbo lyomatango omanene Aanamibia oyendji ohaya kanitha oomwenyo dhawo okupitila miiponga yiihauto nomadhipagathano, niimbuluma ohayi indjipala. 

Sha ikwatelela komugandji gomauyelele omukuluntu gwopolisi moshilongo Kauna Shikwambi, aayendinandjila taya ka talela po aakwanezimo ya kiitopolwa ya yooloka, naya longithe nawa omandhindhiliko gomoondjila okuyanda iiponga hayi holoka unene pethimbo ndika. Shikwambi okwa kumagidha aahingi kaaya hingilile, yo kaaya hinge ye li kohi yomaluvu nenge ya vulwa. 

“Omimvo dha piti, pethimbo ndika lyomatango omanene, oyendji oya kanithile mo oomwenyo dhawo, ihe olundji ohashi holoka kokwaalandula omandhindhiliko gomondjila,” ta ti ngaaka. 

Ta ti, okuhingilila itaku ti okuthika. Nonando oto hingi kashona owu na okuthika ashike. Uuna oshiponga sha holoka mondjiila dhenga konomola yopolisi 10111 nenge MVA 9682. 

Opolisi oya kumagidha oshigwana shi kale sha kotoka, oshoka ethimbo ndika aafuthi oya tegamena okuteya omagumbo omanga ooyene taya ka talela po kiitopolwa yimwe. 

Opolisi oya kumagidha omagumbo ga kale ge na omukeeleli ethimbo alihe, noga kale ga tema pondje ethimbo lyuusiku. 

“Omutenya omalamba naga kale ga dhima oshoka aafuthi ohaya hilwa komalamba shoka tashi ya pe kutya kamu na omuntu megumbo,” tayi ti ngaaka. 

Opolisi oya kumagidha oshigwana shi kale mekwatathano ewanawa naashinda yawo opo ya kalelathane po uuna ya mono omayinyengo ga puka. 

-vkaapanda@nepc.com.na