Auleria Wakudumo
Molukanda laDonkerhoek modoolopa yaKhorixas moshitukulwa shaKunene, Adleritha Haraes weedula 44 oha kongelele oimutu nokuipa oipalwifa oshoyo olukalwa nefiloshisho lokofikola.
HAraes, nedina la shiivika nawa ‘meme woukadona’ olo hali ifanwa moshiingilisa ‘girls mother’ kuvahapu vomolukanda lavo okwa ti okwa tokola okuamena ounona voukadona molwaashi ha mono ominyonena odo hadi ningilwa ounona voukadona molukanda lavo halika sha halika toka.
“Onda tokola ndili twike omutengi ou mudjuu molwaashi omumwange naye okwa tipila meshongo ngaashi ounona voukadona vanini vahapu omu. Efiku limwe omumwange tava ende navakwao, ova hangwa kelume olo la tokola okukwata ounona keenghono. Molwaashi wange okuna ounghundi wokulidenga po, okwa kwatwa koumbada ndele teli denge po fiyo ta hangwa ndele ta ningilwa omunyonena,” Haraes ta dimbuluka nolukeno.
Okwa ti okudja opo, okwa tokola a kale ta amene ounona aveshe molukanda. Nena, Haraes okuna okombifa lokutelekela ounona hai ifanwa ‘Hands of God Soup Kitchen.
Haraes oha tekula ounona va fika po 25, omo 24 oukadona nanehova lavo lomoukadona umwe.
Haraes okwa dimbulukwa nghene edina ‘meme woukadona’ la hovela. Okwa ti okudja nghene a ninga etokolo okuamena ounona voukadona, okwa kala nokulopota ominyonena adishe tadi ningilwa oukadona kopolifi. Opolifi shaashi keshe efiku oyemu pashukila omesho, oya tokola okumuluka meme woukadona. Molukanda, natango shaashi okwa hovela okukufa ko ounona ovo itava fiilwa oshisho kovadali vavo, ngeenge ta toka okudja kokule keshe umwe ota tin ale meme woukadona oye winya tadi kwinya.
Haraes okwa holola kutya onghalo yomolukanda laDonkerhoek oya nyika opanga apa. Okwa ti ounona vahapu ovadja momaumbo ena oluhepo lamemememe nomafiku amwe ohava dulu okukala inava dja molwaashi kamuna sha oikulya momaumbo. Okwa ti, eshi ohashi fininike ounona vaka nyange molukanda ile va hekelwe eedola voo tava longelwa oushada.
Okwa ti onghalo yovadali nayo oinyemateka noDonkerhoek. Ovadali vahapu ova ninga oipikwa yomalodu unene otombo nohava fiye ounona momaumbo. Ounona paife ova ninga kakodi lilifa, kadi li tekula.
“Eshi osho shimwe sha kufa nge momutumba opo ndi tameke okutelekela ounona ava voo vaha ka nyange vali momalukanda amen di shiive okukala naavo itava dulu okushuna komaumbo. Molukanda, omu na ovo va telamena ounona veva pe oshimaliwa, nande odola ashike yoovene yoo va dule okuva longela ouwii,” Haraes ta ti.
Haraes ohaka longa keefaalama odo dili popepi noKhorixas opo a mone mo shokulanda oihape noingumutulu yokutelekela oimutu yaye. Nonande okamaliwa in aka wanena, ohashi kwafenge di va telekela lumwe ile luvali mefiku.
Nonande ongaho, Haraes okwa holola ounwa eshi a kuli ka ounona vaye vamwe. Odula ei, ounona vaheyali ova pondola okushanga ondodo 11 posekundefikola yaWelwitchia oshoyo Outjo.
Okwa ti ouministeli wehongo owemu kwafa unene eshi wa yandja omuhandjo nokufiila oshisho ovo veli kosekundefikola omanga ta kwadjangele naavo veli peendodo dopedu.Haraes ota indile epangelo nomoshiwana opo shi mu kwafe a dule okutunga omuhandjo wounona vaye uli xwepo oshoyo oikulya opo a dule okupalwifa oshiwana shaye. Okwa ti okwa pumbwa yoo eembete dokunangala ounona shaashi ova ninga vahapu paife noipumbiwa imwe ya wedwa po.
Ngeno epangelo nalo nali kale hali yandje oshikukuta sha wana peesoup kitchen adishe opo litu yambidide mokufiila oshisho okaana Okanamibia.