ONGWEDIVA-Aanona monooli oya tyapula esiku lyawo kuyele sho ya dhanene noku tyapula esiku lyo“065 Kiddies Festival” oshikando oshitiyali mOngwediva.

Omukokoli gwo065 Kiddies Festival Martha Niilonga okwali wo a katalela po aanona yeli moombete moshipangelo shaShakati. “Onda ka talela po aanona mboka itaya vulu okuthika nondeya faalela uukwashikependjewo, nelalakano lyokutyapulila pamwe nase esiku ndyoka lyaanona,” ta popi ngaaka.

Niilonga okwa ti, elalakano okuuvitha nawa aanona. Ta fatulula kutya, okweya po nendhilandhilo lyokugongaleka aanona monooli ayihe okunyanyukilwa pamwe omanga omasiku go kili inaaga thika.

Aanongononi oya nyola kutya okudhana kwaanona okuna mo sha muundjolowele womadhilandhilo gawo, onkene oshapumbiwa noshasimana uuna aanona taya nyanyukile pamwe. “Ondeya po nedhiladhilo ndika oshoka onda ndhindhilike kutya aanona oya kolota ohole pamwe naakuluntu yawo, olundji aakuluntu ohaya yi nookuume kawo taya thigi po aanona, sho shoka nda longekidha omasiku ngoka aakuluntu yuuvithe aanona yawo ohole,” ta fatulula ngaaka. 

Ta gwedha po kutya shoka hashi gandja oompito dhafa ndhoka o ngaashi omauliko giipindi ngoka haga holoka ashike iikando iishona, ihe ihaga gandja omahala ga andjuka nawa kaanona ya kale pamwe naavali yawo. Niilonga okwa ti, omumvo taguya oshiindingili shoka otashi ka kala shi  vulithe ayihe ya ningwa omimvo mbali dha piti. –vkaapanda@nepc.com.na