Auleria Wakudumo
Omunashipundi shetanga moshilongo hano oNational Sports Commission Teofelus Alexandel okwa holola kutya olixa ei otai eta elunduluko lipe metanga loomeme moshitukulwa shaHangwena.
“Oule wefimbo, etanga lokeemhadi ola kala la talika ko onga oudano wootate. Ashike eshi nda tala omafamba taa fange etanga nena naashi eli tula mo moudano omu, etanga oudano wa keshe umwe,” Alexandel ta ti ngaho.
Alexandel okwa ti oNational Sports Commission oya itavela kutya oitalendi oili keshe moitukulwa yoshilongo okudja ngaho kedu loimungu fiyo okefuta fiyo omoshitukulwa shaHangwena.
Alexandel okwa yandja oshihopaenenwa shomudanitanga dingi noNamibia Zenatha Coleman oo a danene otima yoshilongo oshoyo kondje yoshilongo.
“Coleman naye okwa tameka ashike ngaashi nyee, fiyo ta hoololwa koshitukulwa shaye ngolongo a ya danena otima yoshilongo fiyo okondje yomafuta. Nanye otamu dulu okuenda ondjila oyo Coleman a enda,” Alexandel ta tu ovadanitanga omukumo
Omunambelewakulunhu wetanga moshitukulwa shaHangwena Paulina Kasheeta okwa holola kutya olixa yetanga mOhangwena otai holola elitulemo okuhasholola oshoyo elongelo kumwe noimwainafana moshiwana.
Kasheeta okwa pandula ovadani tanga aveshe ovo va kufa ombinga molixa ei.
“Omwa longa noudiinini okukwashilipaleka kutya omwa yambula po etanga lokeemhadi loomeme moshilongo nokukwashilipaleka kutya omwa yambula po yoo olixa yoomeme moshitukulwa shaHangwena. Omwa holola kutya nonande ongula oi kale tai nyenge omupolo, oto dulu okuhanga efindano,” Kasheeta ta holola nomukumo.
Kasheeta okwa indila ovanangeshefa noohandimwe moshitukulwa shaHangwena opo va yambidide etanga loomeme moshitukulwa. Okwa ti olixa kaina nande omukwafi umwe ka kele koNamport oyo hai yambidida nakashona oko ina po oko luhapu ihaka wanene eemhumbwe adishe detanga, mwa kwatelwa omuhandjo noipalwifa yovadanitanga.
Kasheeta okwa twa omukumo oukadona ovo opo tave ya mowela novena eendjodi dokukaninga ovadanitanga opo va diinine oitalendi yavo. Okwa ti paife eemhito detanga lovakainhu oda yeulukila keshe umwe notava dulu okuhanga eendjodi davo.
Omunashipundi wolixa yoomafamba moshitukulwa shaHangwena Elia Vilho okwa holola kutya olixa oya hovela Etitano fiyo Osoondaxa.
Eetima hetatu oda kufa ombinga molixa yoomememoshitukulwa shaHangwena neudo. –wakudumoauleria@gmail.com