Ndinondi ngunda ari hi ya twa onya kongombe, otja tjirwa ama kumuka aa toora ondjira yOvamango yokomuhuka.

Kutja ma kayatakaṋe kOtjombinḓe, Oeisepa, na Pukiro. Hapo harukuru omayuva womasuviro inga ve mu suvise mEpukiro. Ozo azeendatu nḓeri ozoresevate ma pondera nokuyata ozondambo ozongoto moviṱo pekepeke. Konoo tamuna orutu rwovaṱuta rwa Pukiro indwi Oeastern Epukiro Farmers Association, ousupi OEEFA nu tjinene orutavi rwayo rwa Eisepa nokuhina okutamuna ena ndi Karii Marenga.

Marenga ketjiko rukwawo kehi youvere mbwe mu ramanaga oruveze orusupi nganda Oroviungura nda zuko au mu wisire mOtjomuise ma yeterwe okuyekupaha omapangero. 

Umwe waimba mba ungura pu na ye nu ngu me mu tjiwa nawa, Mbasara Mbuende, mondjozikiro ye kuye mu Keetute yOmurari wOndjivisiro Ombaranga wOnamibian Broadcasting Corporation (NBC), ku nOmuiisane Tjizo Tjaveondja, Oritjavari, wa yauzire kutja otjotjiri ouṱuta, nu tjinene orutu rwovaṱuta indwi OEEFA, okuutira mEpuiro ngandu tji ma katjombokisira mOeisepa, otjiṋa omuyaruke Marenga tja ungurira. 

MEpukiro na Eisepa ndino ndi omaraisiro omuano auhe mbu mau tjiukwa nokuiisanenwa kutja ozoskou poo ozoexpo ze tjiukwe. KOEEFA Mbuende ka kwamba ko ourata wOkarukondwa kOmatoororero ka Tjombinḓe kakutja nao tjandje wa yata motjitamba tjoporotika eye mari okaṋepo kOswapo okakuru nokaṱakame. Ma kondjisa ngandu moruveze rourumbu ma tware ngwari Oministera yOtutumbo nOvikunwa, John Mutorwa, kOtjombinḓe ozondjombo zourumbu ze katoporwe.