Ehangano lyi na sha niiponga yomoondjila (MVA) Fund olya tulwa momalimbililo kiiponga yaholoka oomwedhi dha zi ko, mwa kwatelwa omayipumomumwe, egalangato lyoohauto osho wo omaso taga yalulwa ga pita poopelesenta 50.

Iiningwanima oyindji oyali ya lopotwa pokati komasiku 19-26 gaJuli nuumvo, pethimbo aantu oyendji yali ya kanitha oomwenyo miiponga yiihauto miitopolwa  Khomas, Oshikoto oshowo Kavango gokuuzilo, sha popiwa momushangwa gwali gwa pitithwa kehangano lyoMVA, Etitatu lya zi ko.

Momushangwa omwa popiwa iiningwanima iinene ya holoka moomwedhi dhoka, omwa kwatelwa omwaalu gwaantu ya hulitha miiponga yiihauto noya lemanena mo okuza momasiku 01 Januali sigo Juli nuumvo, taga yelekanithwa nethimbo  lyaafathana omimvo mbali dha piti.

“Omawuyelele ga gongelwa kehangano ndika otaga ti, omayipumomumwe oga  shuna pevi noopelesenta14, iiponga ayihe kumwe onoopelesenta 14 omanga omaso ga shuna pevi nopelesenta 15, okuyelekanitha nomimvo 2018 no 2019,” omushangwa ngoka tau ti.

Iiningwanima yoludhi ndoka oya shuna pevi noonkondo muApilili sho kwali kwa ningwa epato lyoshilongo ashihe molwa omukithi gwoCovid-19 gwali gwa keelelitha omayinyengo pokati koondolopa oshilongo ashihe.

Omayipumo mumwe gali ga lopotwa muMalitsa ogali omashona geli kohi noopelenta 59, omanga omaso muApili gali kohi yoopelesenta 60 geli pevi naangoka haga lopotwa shito momwedhi.

Omunaani gwehangano MVA Rosalia Martins-Hausiku momushangwa okwa pandula molwa eshuno pevi lyiiponga ta ti lya humithakomeho egameno nelongelo kumwe moondjila.

 “Elongitho nawa lyoopate, olya gandja omukumo kaalongithi yopate moomimvo adhihe dha piti, shoka tashi ulike kutya Namibia alihe olina elalakano nesikamaneko oshowo okukaleka po oopate ngaashi shili mompango dhelandulathano lyoopate dho2011-2012,” sha popiwa momushangwa.

Martins-Hausiku okwa kumagidha oshigwana shi iyande koku enda ondjila oonde inaashi pumbiwa, unene momahulilo shiwike. –Nampa