Minista wounamapya opamwe noongoloneya vokoitukulwa imwe yanooli ova talela po oilongo ivali, Angola naSingapore shi na sha nomapekaapeko enasha noinima yanyama kounamapya.
Etalelepo ola li yoo linaha nomauyelele nghee oilongo iva li tai shi endifa oku yambulapo omaliko ayo, oku dilila koshikondo shounapya.
Ngoloneya waHangwena Kadiva Hamutumwa oo naye eli omukufimbinga mosheendo eshi shaya ko Angola, okwa ti ova talela po ofaalama yedina Mbimbi moshitukulwa shaCunene moAngola, oko va ka kwashilipaleka nghee Angola ha eta po oikulya omaludi nomaludi, vo va mone ko oshihopaenenwa.
“Elalakano letalelepo lofaalama ei, okupewa yo omayele kuAngola nghee he shi endifa mokweeta po oikulya, omaushosho aa hava longifa, omashina naikwao ya wedwa po,” Hamutumwa ta ti.
Okwa yelifa yoo kutya unene vo ova hala okupewa omikalo dokukuna epungu, osho yo oilya ei hai eta po omaufila eemboloto, opo va dule oku di tula moilonga vo va tameke okulonga oikulya yoludi eli tai dulu okukwafa ovanhu vahapu poshikando.
Ofaalama yaMbimbi vati oyo imwe yomeefalama dakula moAngola, nohai yandje oikulya kouminsteli wounamapya moshilongo.
Manga oongoloneya ve liteyala moAngola, ye minista Selma Ashipala-Musavyi ota ti ye koSingapore okwa ka konga ekwatafano liwa, neeminista edi hadi ungaunga noinima ya nyama kouministeli waye, opo va dule okulipa ounongo, osho yo omauyelele nghee ve na oku shi enda opo va kulike eliko loshingo, okudilila koshikondo shounamapya.
