ONAMBUTU – Oshiwana shomomukunda Onambutu osha tanga mwene womukunda wavo Kanana Hishoono tashi ti okwa li omulumenhu ha longo pauyuuki nokuhole ombili. Hishoono okwa xulifa oshivike sha dja ko mepupi lomido 89, koshipangelo kOndangwa. Okwa li omukondjelimanguluko nokwa dana onghandangala yakula moSwapo okudja pefimbo loita. Okwa li natango omuyandjimayele kOvapresidente ngaashi Omukokolipresidente Sam Nujoma osho yo Hifikepunye Pohamba.

Hishoono ota pewa efudiko lopapangelo konima eshi Omupresidente a pitifa omukanda nelalakano loku mu tumbaleka.

Onghela oshiwana sha dja momukunda Onambutu osho yo omikunda dopoushiinda osha holoka momwaalu muhapu okulila Hishoono. Omonamati waye Abed Hishoono okwa hokolola ta ti xe ota lilwa kOvanamibia aveshe shaashi okwa li omukondjelimanguluko, a li kondje yoshilongo opo Namibia a kale a manguluka. “Nena ohatu lili tate wetu, omulumenhu ou kwa li e na oshisho noshiwana nokuhole elandulafano,” ta ti.

Okwa ti xe okwa wanifa po oshinakuwanifa shaye shaashi okwa yakula nawa Ovanamibia.

Abed okwa ti xe okwa li omulumenhu e hole okupwilikina nawa alushe ngeenge ta popi nounona vaye ile nakeshe umwe.

“Tate okwa li omulumenhu e hole okupukulula ovanhu shaashi kakwa li ehole atu ningi omapuko meumbo,” ta ti.

Kansela moshikandjohoololo shEenhana Olivia Hanghuwo okwa ti Hishoono okwa fiya po oukwatya muwa wa pumbwa okulandulwa kovanyasha.

Ovashiinda vaHishoono ove mu hokolola tava ti okwa li omulumenhu e na oushiinda uwa shaashi okwa li e hole okutalela po ovashiinda shaye.

Kapatashu womukunda Onambutu Shimweefeleni Kandjabanga okwa ti ova kala ve na ekwatafano nelongelokumwe liwa naHishoono.

“Okwa kala e linekela nge alushe. Otwa kanifa mwene womukunda wetu muwa,” ta ti 

Hishoono ota fudikwa mongula komaendo omapendafule kEenhana.

Nena otaku ningwa efudiko lopapangelo keumbo laye, omo Omupresidente naye ta ka kala a fika.

-fhamalwa@nepc.com.na