Auleria Wakudumo 

Omunangeshefa nomuhondji kamana Thoivo Akuunda oha hondjo oidjalomwa yoshinanena oyo hai kufa vahapu koipundi monooli. 

Akuunda okwa ti okwa ti ounongo wokuhondja owa tamekela mongulu yofikola. Okwa holola kutya okwa dja kokukonda oidjalomwa mongulu fiyo osheshi a mona kutya ota dulu okuuya po noshikutu shoovene. 

Okwa ti okwa li ehole okukonda oidjalomwa moimbapila yee tai tula kumwe oikutu oyo. 

Aishe ei oya hovela kofikola Ambili Combined moshitukulwa shaShana unene pefimbo lotundi yokufaneka. 

“Onda tameka okuhondja ndina eedula 12 omanga ndili mondodo onhiheyali,” Akuunda ta holola ngaho. 

Akuunda okwa holola kutya omidjalo oha di ende nokulunduluka. Okwa ti eshi ohashi mutu omukumo opo a kale ta longo noudiinini nokunduluka po omidjalo odo dili mopula. 

Okwa ti nonande ena ounongo wokuhondja wopombada, ovandulukipo voikutu moshilongo otava ende nokuhapupala. Okwa ti ouna okukala alushe to tale kutya oshike tashi ya momoode opo a kalekepo ovalandi vaye. 

“Ka kele kokuhondja, ohandi mwenyeke yoo oivilo onga omupopi, hadi deula okupopya eemhata hano odebate. Ondeli longela yoo ouhongi nondili andi kongo oilonga,” Akuunda ta ti ngaho. 

Okwa ti oha tuwa omukumo kovalandi vaye, mokwaaluka kwavo, tave mu pula opo a hondje natango oikutu yavo oshoyo okumona eecustoma odo hadi mono oilonga yaye kuvakiwao ile kepandja laye. 

Akuunda okwa ti oha nduluka oikutu yovanhu ovo unene ve hole okufewa voo va kale ve udite etumba okudjala oikutu oyo. 

Okwa ti okwa hala okukala ta hondjo oikutu yongushu, ya yooloka kovahondji vakwao. 

Akuunda okwa twa omukumo ovanyasha, unene ovo vehena oilonga opo va konge yoo oilonga mounongo o ova pewa kuKalung. Okwa ti okumona kutya owa pewa oshipewa shilipi kuKalunga nokushi tula moilonga otaku ku kufa koshi. 

“Oshitalendi shoye osha pumbwa elitulemo, elididimiko netule moilonga. Kutya nee oto hondjo ile keshe eshi to ningi, ouna okukala weli tula mo,” ta tu omukumo ngaho. 

Akuunda okwa holola kutya ongeshefa ha keshe fiku hai ende nawa. Okwa ti nonande otashi ende nai, ino pumbwa okukala wa fya ohoni oilonga oyo hai tula omboloto yoye poshitaafula. 

Akuunda okwa ti opena oikando imwe ovanhu vahe ya konhele yaye yoilonga, va hala okumusheka shaashi vati omulumenhu, ha ningi oilonga yoshikulukadi. Eshi okwa ti ihashi mu teya omukumo ndele ohashi mu pe eenghonoa opo elitule moilinga yaye. 

Okwa ti ovanyasha inava kala va teelela ashike omboloto okudja kepangelo ndele nava nyangadale voovene. 

-awakudumo@nepc.com.na