Ndohotola a tseyika nawa mokupanga omeho moshilongo, Helena Ndume, okwa kumagidha aavali ya shonopaleke okugandja oongodhi kaanona aashona, oshoka osha nika oshiponga.
Ndume ndhoka okwa li e dhi popi moonkundathana noshifokundaneki shika sho a li ta gandja uuyelele kombinga yokukonaakonwa komeho, hoka taku ningilwa aanona yosikola oshali mOshakati.
“Omulilo gongodhi ogwa nika oshiponga kaanona aashona oshoka ohagu vulu okuyonagula omeho gawo, taya kala ihaaya mono kokule,” ta fatulula ngaaka.
Ta ti, aavali yopayife ohaya etha aanona taya dhana oongodhi unene, nomeho ohaga tala unene omulilo gongodhi, ihe kashi li mondjila.
Ta kumagidha kutya oshiwanawa ngele taya tala oradio yomuzizimbe, ihe nayi kale yi li kokule kashona.“Uuna aanona haya tala omililo ndhoka ethimbo, oshiwanawa ngele taya kala haya tulwa omiti dhomeho okukeelela eyonuko lyomeho,” ta ti ngaaka.
Ndume okwa ti, oshikonga shoka shokuminikila nokugandja omakende osha li moshipangelo shaShakat i , sha tameke le mOmaandaha notashi hulu nena.
Ta ti, oya li ya tengeneke okuminikila nokugandja ashike omakende kaanona yosikola okuza pomimvo hetatu sigo 19, ngeno ye li ashike 500, ashike omolwompumbwe oya ka pitilila po.
“Oshikonga shika osha tulwa miilonga omolwaayambidhidhi ya pyokoka nawa mboka ya zi koBritain, mboka natango ye ya niilongithi yawo osho wo omakende ngoka ya pe aanona,” ta fatulula ngaaka.
Ndume okwa ti , oy a yambidhidha aanona yosikola oshoka oyendji oya taalela uupyakandhi womeho, ihe kapena eyambindhindho lyasha.
“Onda longekidha ngaaka kokalinika komeho kOshakati, opo tu kwathele aanasikola mboka taya nyengwa okulesha nenge okugwanitha po iilonga yosikola omolwuupyakadhi womeho,” ta fatulula ngaaka.
Saima Ndinoshisho ngoka a li a fala okanona ke komimvo omugoyi ka konakonwe okwa ti okwa kala e na uupyakadhi wokanona ke haka ehama omeho, ihaa ka mono ko nawa, ihe nena okwa kwathelwa.
“Okanona kandje oka kwathelwa nomakende, otatu pandula oshoka nena oke wete ko nawa koshipelende,” ta ti ngaaka.
Festus Kalimba omunasikola pOkatana okwa ti, okwa mono omakende ge oshali, nonando a kala e li mompumbwe ihe ina vula oku ga mona omolwompumbwe yoshimaliwa.
-vkaapanda@nepc.com.na
