ONDANGWA – Minista gwomayambulepo goondoolopa niitopolwa yokuushayi James Sankwasa, okwa kumagidha aagandji yiilonga kaanyasha ya mana kiiputudhilo yopombanda, yaa pulwe we ontseyo, ihe naya pewe iilonga, ootendela osho wo ompito dhooproyeka ya mone nawa ontseyo.

Ndhoka okwe dhi popi Omaandaha sho a li a patulula oshigongiilongo shookansela kOndangwa.

“Sho hamu pula aanyasha ontseyo yoomvula odhindji, otaye yi kutha peni ngele opo ya mana eyilongo lyawo, olye te ya pe ontseyo ngele hane?” ta pula ngaaka. 

Ta nyenyeta kutya kashi li mondjila okupula ontseyo yiilonga kaanyasha, oshoka kaye na mpoka taye yi kutha.

Sankwasa okwa ti oya uvaneke ekandulepo lyokwaa na iilonga lya taalela unene aanyasha. Otali zi po ngiini ngele aanyasha itaya kutwa molwonsteyo ndjoka yaa na? “Aanyasha oyendji ya za kiiputudhilo yopombanda, ngaashi yopaungomba natango oye li momagumbo yaa na iilonga ashike otaya vulu okulonga, oshike itamu ya pe ompito?” Ta pula ngaaka.

Ta gwedha po kutya uupyakadhi wiilonga otau kandulwa po ashike ngele ooproyeka, ootendela tadhi gandjwa kukehe gumwe.

Momushangwauvaneko goSwapo omwa uvanekwa kutya otaya eta omalunduluko moshigwana uunene maanyasha. 

Omutse gwoshilongo Netumbo Nandi-Ndaitwah okwa li u uvaneke poshigongi shaanyasha shoSwapo sha li sha ningilwa mOngwediva kutya iilonga yaaluhe otayi ka gandjwa pwaa na omapulo goontseyo.

“Otandi thindi omuthindo unene pekandulepo lyuupyakadhi wokwaa na iilonga maanyasha, osho wo melongo,” a uvaneke ngaaka.

Ta gwedha po kutya ota kwashilipaleke kutya kohi yelelo lye, iilonga itayi kala uupyakadhi moshilongo.

Nandi-Ndaitwah okwa li a kwashilipaleke kutya, otapu totwa omilandu dhokwaapula aalongwa ya mana eyilongo lyawo kiiputudhilo yopombanda ontseyo dhoomwendhi oondatu nenge hamano.

Sho osho shoka uuministeli osho wo omahangano ga yama kepangelo ga pewa oprogalama yokugandja ompito yokudhewula aanona ya mana kiiputudhilo yopombanda.

Epangelo okuza omumvo gwa yi olya kala nokupititha oompito dhiilonga.

-vkaapanda@nepc.com.na