Auleria Wakudumo 

Oshikunino shedina Pronego Green Farm momukunda Ekamba B moshitukulwa shaShikoto otashi palula onooli aishe. 

Mwene woshikunino, Penda II Nantinda okwa holola kutya oshikunino ohashi landifa oikunomwa keefitola dakula ngaashi Model oyo ya li nale hai ifanwa oPick ‘n Pay osho yoRani Group modoolopa yaNdangwa.

Oshikunino Pronego Green Farm otashi tu vahapu omukumo kutya nonande oshikunino oshinini, shama ashike we litula mo, oto dulu okudja kokulandifa pumushiinda woye, momukunda weni fiyo osheshi wa tameka okulandifa keefitola domadina. 

Olweendo loshikunino shaNantinda ola hovela mo2022 eshi a tameka tete okukuna oihakautu. Nantinda okwa holola kutya oproyeka yotete oya xulila mounyengwi eshi oihakautu aishe ya fya molwaashi ka li e na ounongo wawa na. 

“Onda kanifa oshimaliwa shihapu ashike nande ongaho inandi shuna omutwe moipeta. Onda tokola okuya kofikola, ndi ka konge ounongo wa yooloka mokulonga noihape osho yo oingumutulu noikunomwa aishe,” ta holola ngaho.

Mo2023, Nantinda okwa tula vali etemo momupini. Oshikando eshi, okwa kuna omanyoto, ombindi yokoushimba, omakeembidji naikwao ihapu. Pefimbo lodula, oha kunu oilyavala, omapungu, omanyangwa nosho tuu.

Eshi haku ti dengwa u lungame, Nantinda okwa kwashipaleka ovanailonga vaye vatatu navo ova mona owino wokulonga moshikunino. 

“Ava ovo va pumbwa owino unene shaashi ovo hava fiile oshisho oikunomwa yetu,” Nantinda ta ti. 

Nantinda ota dimbuluka oshikando va landifa oipakete 50 koModel omwedi umwe. Kakele kokulandifa, mwene woshikunino okwa holola yo kutya oku udite etumba okupalula ovanhu vopomudingonoko wavo unene ovo ihava tema osho yo ovakwanedimo laye. 

Okwa ti oshikunino ihashi landifa ashike keefitola, ashike ohashi palula yo ovakwashiwana pomudingonoko. Vahapu ohava futwa ongolupandu eshi va kwafela moshikunino. 

Nonande te shi endifa nawa, Nantinda okwa ti natango ova taalelwa komashongo omeva. 

Okwa ti ohava longifa omunino waNamWater okutekela oimeno osho hashi eta ondado yomeva i ye pombada neenghono. 

Nantinda okwa weda po ta ti okwa li a ninga eindilo kepangelo, ta pula a kwafwe opo a fulilwe omboola ashike ina nyamukulwa. 

Okwa ti natango ota shuna konhu yepangelo opo a ka konyole pamwe kemanya taku di ondwi. 

Nantinda okwa holola kutya moshoongalele osho sha li sha nuninwa ovanyasha kombinga younamapya, sha ningilwa mOniipa Etine, okwa kufa mo shihapu nota ka twikila keembelewa opo a mone ekwafo lomboola. 

Meenghundafana naKundana Nantinda okwa twa ovanyasha omukumo opo va hovele oikunino ile ongeshefa keshe voo va shiive okumona mo oyuuyemo. 

“Ohandi dimbuluka oshikando shimwe nda landifa oipakete yomanyoto i li 20. Oshipakete keshe ohashi kosho N$250, ngaho osha hala okutya onda landifa N$5 000 koshivike okudja momadama oo aeke,” ta tu ovanyasha omukumo ngaho. 

-awakudumo@nepc.com.na