OSHAKATI – Elelo lyondoolopa yaShakati otali hiya oshigwana shi ninge omayindilo gomahala komauliko giipindi nuumvo. 

Sha ikolelela komushangwa gwa pitithwa kelelo lyondoolopa, oofooloma odha pita mo na kehe gumwe okwa manguluka okuninga omayindilo. 

“Omauliko gomazimo ga tseyika nawa Totem Expo nuumvo otaga ka tameka momasiku 29 Mai sigo 6 Juni. Otaga ka ningilwa mokapale kemanguluko kOshakati moka haga ningilwa shito,” ta ti ngaaka. 

Oya shanga kutya ofooloma otayi pula ashike N$150, naangoka ta ka pita mo ota ka futa oondando dhi ili sha ikwatelela kokatala hoka ta kutha. 

Okwa fatulula kutya okatala kiilandithomwa iishona mwa kwatelwa iikulya niikunwa oke na N$1 500, kiikulya yOshiwambo N$500 okapana N$1 500 komahangano nooministeli dha yooloka N$5 000 omanga mboka tau ka kala kondje yokapale N$750. 

Oya gwedha po kutya omauliko gomazimo niikwaipindi gaShakati ngoka hagi ithanwa Totem haga kala ko omumvo kehe, oga tamekele okuza momumvo 2012. 

“Omaulikilo ngaka otaga ka gandja ompito ombwaanawa kaanange shefa aashona okushingitha osho wo egandjo lyomauyelele komauministeli gi ili nogi ili nosho wo kiikondo yepangelo naambyoka yaa shi yepangelo,” ya ti ngaaka. 

Momaulikilo ngoka otamu ka kala omathigathanopo ogendji. 

Ya ti, otamu ka kala aayimbi kamana nosho wo ethigathanopo lyokakadhona dhingi kaTotem. 

Elelo lyondoolopa olya ti, kehe ngoka ku shi nawa ezimo lyoye nenge ku shi sho hali itanga, onawa wu ye komaulikilo ngaka, wu pulakene nkene hali tangwa nosho wo okuuva nawa ondjokonona yalyo.