Aakalimo moshikandjohogololo Ompundja itaya ka enda we oondjila oonde oku ka mona uuhaku, sho epangelo lye ya tungile okakilinika kopamuthika, ka tungwa koomilliona N$4.

Minista guuhaku nonkalonawa Dr Esperance Luvindao ngoka a patulula okapangelo hoka kOmpundja Etitano okwa li a patulula wo natango oombelewa yiipambele yaanambelwa yuuhaku mOshakati, ndhoka nadho dha tungwa koomilliona odhindji.

“Ohashi nyanyudha ndje aluhe ngele tandi patulula iipangelo, unene kombinga yokuushayi oshoka otashi ulike kutya oshigwana oshi niwe nasho sho otashi mono omayakulo,” ta pandula ngaaka.

Ta ti, nguka omukundu gwa kandulwa po, okulefa oku ka mona uuhaku kokule, hoka ku na iipangelo. Nena aakulupe osho wo aanamukunda oya etelwa omayakulo popepi.

Luvindao okwa ti, okapangelo hoka otaka kala ke na aapangi ya gwana osho wo ndohotola ngoka taka ta yakula, opo aanuumvu kaya kale taya tuminwa kiipangelo iinene.

“Omanga ndi li mpaka, onda hala okukumagidha aayakuli ya kale taya sile oshimpwiyu omatungo giipangelo ngaashi nana omahala goombelewa geli ga yela noga silwa oshimpwiyu,” ta kumagidha ngaaka.

Ta ti, ina mona nale oombelewa dhi na oombuli tadhi ziya omeya gomvula, ihe iipangelo mbyoka yi na aanumvu oyi li moonkalo itaadhi hokitha.

Kansela gwoshikandjohogololo Oshakati East Abner Shikongo, ngoka a li a popi peha lyakansela gwoshikandjohogololo shOmpundja okwa ti, enyanyu ye na olyi vule lyambishi e li megumbo mwa tselwa. “Okapangelo haka otaka ka yakula oyendji, kaye shi ashike yomoshikandjohogololo Ompundja ashike noyopomikunda dhopopepi,” ta popi ngaaka.

Samuel Shinigayamwe gwomukunda Ompundja okwa ti, ehumokomeho osho lye ya adha.

“Itandi ka tala we omiti dhandje kokule, shika otashi pe ndje omukumo ndi kale itandi faula okunwa omiti dhandje, shaashi oshipangelo oshe ya popepi,” ta pandula.

Ta ti, nale okwa li ha lefa, nena ota ende ashike, thimbo limwe kakwa li anuwa ha kala noshimaliwa shokuya koshipangelo oshinene.

-vkaapanda@nepc.com.na