OSHAKATI – Ngoloneya woshitukulwa shaShana Hofni Iipinge ota longo nondjungu eshi natango a yandja oipundi 50 kofikola Ekuku Primary i li mOshakati.
Oipundi oya yandjwa oshivike sha dja ko notai ka longifwa kovanafikola.
Okwa didilikwa ngoloneya waShana okudja omudo wa dja ko e shi a ya koshipundi a kala nokuyandja omakwafo koshiwana unene tuu ovanhu ovo ve li momhumbwe.
Ovakulupe navo ova mona omauwa okuyambididwa okupitila mombelewa yangoloneya ou.
Konima yoivike ivali natango, Iipinge okwa li a yambidida ovanafikola eshi va pewa omidjalofikola mwa kwatelwa omapando eenghaku. Ngoloneya okwa ti ombelewa yaye otai lalakanene okuyambidida ovanafikola osho yo ovanhu ve li momhumbwe yoipumbiwa.
“Otwa didilikwa eefikola moshitukulwa shange da taalela omashongo a yooloka mwa kwatelwa ovakwashiwana tava dengwa koluhepo,” ta ti. Iipinge okwa yelifa ta ti oipundi oyo a yandja okwe i pewa kehangano ledina Roam Manufacturing hali longo oipundi, oitaafula osho yo omaludi oikwapilangi a yooloka.
“Onda pula mwene wehangano ngeenge oipundi i li metala okwe i pumbwa ndele ta ti ahawe. Okudja opo onde mu pula opo ndi kufe po oipundi ei shaashi onda hala oku i twala kofikola,” ta ti. Ngoloneya okwa ti eshi a pewa oipundi ei okwa pula ombelewa yehongo ngeenge ope na ofikola i na omhumbwe yoipundi mOshakati ndele te i twala ko. Iipinge okwa ti oipundi ei otai ka eta elunduluko lakula shaashi paife ovanafikola itava ka longelwa ofika ile ve li omutumba pedu. Okwa pula omahangano a yooloka e na ehalo lokuyambidida eefikola opo a kwatafane nombelewa yaye.
“Osha fimana ngeenge hatu yambidida ovanafikola noikwafifohongo shaashi otashi vatu omukumo wokulihonga osho yo ovahongifikola va longe noupu,” ta ti.