Omupilimaminista woshilongo Elijah Ngurare okwa kunghilila eefikola, omo a yukilila ovahongifikola va xulife po omukalo wokutaataa ounona mofikola.
Edi okwe di popya pefimbo a li a ka talela po imwe yomeefikola moshilandopangelo kutya, ovanafikola nava pukululwe ashike, ponhele va telwe momapandaanda.
“Evyulo lounona inali xulila ashike keumbo ndele nali twikile ashike fiyo tava mane eefikola, shaashi ngaho eenghalamwenyo davo tamu tete di ninge dixupi, odo kwa li tadi dulu okukala da ya kokule,” ta ti.
Okwa twikila kutya ngaashi ounona vopaife ova kwatwa ko koinima ihapu, omo mwa kwatelwa elongifo lopangwe, osho yo oludi lomakaya unene olo la shiivika nawa ongaHubbly Bubbly.
“Ponhele ounona mu va tele momapandaanda vo va ka kale nee oilyatelelo yoinima i li ngaha, kongeni omukalo wokulonga navo nye mu va tule yo mexungomwenyo, opo ashike tava dulu okukala ve ya kondjila,” ta ti.
Okwa kunghilila yo ovanafikola ava ve udite va wila mekano, ndele kave wete nghee ve na okudja mo va konge ekwafo apa tava dulu, osho yo kovahongi, pamwe enongo taa fe ngaho ongobe.
Okwa twa yo ovanafikola omukumo kutya vo kave na lela eshi va pumbwa, ova pumbwa ashike okulihonga noudiinini, shaashi epangelo otali twikile ashike nokuyandja omakwafo aeshe e lixwa po, omo mwa kwatelwa yo ehongo loshali.
“Kamu na oinakuwanifa yasha, ihe fi okulihonga noudiinini. Nye osho ashike mwa pumbwa osho,” ta ti.
