Uuministeli welongo, uungomba, aanyasha, omaudhano, uunkulungu nosho wo oonkuluhedhi owa yambidhidha osikola Hochland High koWindhoek noshimaliwa N$60 000 okumana etungo lyokugongala.
Uuministeli owa ti, owa yambidhidha ngaaka, sho wa pewa omukumo kosikola ya gongele oshimaliwa N$30 000 nelalakano lyokutunga etungo ndyoka.
Minista gwelongo Sanet Steenkamp, esiku ndyoka okwa li a popitha aanasikola noku ya kumagadha ya itule mo melongo lyawo.
“Osikola oyo oshipatululo okupatulula onakuyiwa yoye onkene manga wu na ompito ndjika, yi longitha nawa neyitulemo omanga wu na ethimbo lya gwana,” ta kumagidha ngaaka.
Ta ti, epangelo olya uvaneke okulonga nuudhiginini opo okanona Okanamibia ka kale ka mona elongo, sho osho shoka tali longo ngeyika.
Ta gwedha po kutya otaya tsikile okulonga nuudhiginini okugwanitha po shoka ya uvanake, opo elongo lyi taandele.
Omuprimaminista Elijah Ngurare ngoka naye a yambidhidha noshimaliwa N$5 000, okwa li a kumagidha aalongwa ya tule elongo miilonga, e taya ikaleke kokule niinima iiwinayi.
“Kaleni kokule niinima iiwinayi, oondjila dha puka osho wo okukwatwa komadhiladhilo omawinayi ngaashi gokwiikutha omwenyo,” ta kumagidha ngaaka.
Omukuluntu gwosikola peha lyaalongi naalongwa okwa pandula komayambidhidho, opo ya tunge etungo lyawo ndyoka tali ke ya yambidhidha poompito odhindji.
Oshilyo shaakalelipo yosikola shimwe nasho osha holola enyanyu sho ya yambidhidhwa ngaaka.
Oosikola odhindji odha taalela uupyakadhi womatungo, iilongitho ashike ohadhi ningi oonkambadhala okugongela oshimaliwa omanga epangelo tali ya tsakaneke ondjilakati.
