Okamatyona keedula 16 oka xulifa eshi ka dipawa kokashelu omanga okamatyona
keedula 15 oka monifwa oshiponga eshi nako ka kwatwa kokashelu pefimbo kwa li tava lifa.
Oshiningwanima osha ningwa mexuliloshivike komukunda Elundu moshitukulwa shaHangwena efimbo lokomatango.
Nakufya okwa tongololwa oye Petrus Kambode omukalimo womukunda Elundu.
Omukulunhu koshikondo shokukonakona oimbuluma wopolifi moshitukulwa shaHangwena omupedukomufala Melanie Mburu okwa koleka oshininganima eshi.
Opolifi oya hokolola tai ti oumatyona ava okwa li tava lifa eengobe noikombo pefimbo olo odula ya tameka okuloka i na oushelu.
Okamatyona ka mona oshiponga oka twalwa koshipangelo shEenhana opo ka mone epango lopaunamiti.
Opolifi oya hokolola tai ti oke li monghalo i li xwepo.
Omunambelewawiliki koshikondo shetengeneko longhalo yomhepo Odillo Kgobetsi okwa kumaida oshiwana opo shi kale sha ngungumana shi li meenduda ngeenge ku na odula i na oushelu nomingungumo shaashi eshi osha nyika oshiponga.
“Omunhu ngeenge okwa hangika ta lifa na ninge onghendabala yokukala e li kokule noimuna. Okashelu kake hole omunhu e li popepi noimuna,” ta ti.
Okwa weda po ta ti oshiwana inashi pumbwa okukala shi li mumwe noinamwenyo ngaashi eembwa, oumbishi ile oikombo ngeenge ku na odula tai shela shaashi otashi eta okashelu ka kwate ovanhu noupu.
Okwa ti oshiwana nashi xulife po kukala tashi longo momapya ile okukala tashi tu oilya koshini pefimbo lodula tai shela shaashi eshi ohashi dulu okweeta oshiponga ile
efyo.
