Auleria Wakudumo
Omulumenhu weedula 39 okwa tulwa moipandeko eshi vati a denga otuwa yaye momuti oikando ivali owina opo a futwe kehangano lomakwashilipaleko omaliko, hano oinsurance.
Oshiningwanima eshi osha ningilwa momukunda Elyambala popepi nOmhalanga Mills mOngwediva, sha ningwa efimbo lokeengulasha po01h50.
Omukulunhu wopolifi koshikondo shokukonakona oimbuluma moshitukulwa shaShana Frederick Ndjadila okwa holola kutya oshiningwanima osha ningwa muDesemba 2025 ashike osha kala tashi konakonwa fiyo opaife.
Otaku hokololwa omufekelwa vati a denga otuwa yaye oikando ivali momuti ndele ta i koshitaasi shopolifi opo a ka lopote kutya otuwa yaye oya li moshiponga.
Omufekelwa vati okwa yandja ehokololo laye kutya okwa li ta shingi okudja koushilo woMhalanga Mills a uka kouninginino eshi a shakena notuwa oyo ya li ye mu temena omalamba a pwa ko fiyo ta di ko kopate shaashi ke wete ko ndele te lidenge momuti.
Okwa ti kopate okwa dja ko shaashi ina hala okulidenga motuwa oyo ta popi ndele te lidenge momuti oo u li popepi nopate.
Omapekapeko opolifi okwa holola kutya omufekelwa okwa denga otuwa yaye oikando ivali momuti owina opo a shiive a ka tule mo eindilo lokumona oshimaliwa kehangano lotuwa yaye.
Opolifi oya holola yo kutya oya pondola okumona okavidio oko ta ka ulike eshi ta denge otuwa yaye momuti oikando aishe ivali. Okavidio oka ulika yo kutya opa li otuwa imwe I li popepi naye omanga ta denge otuwa momuti.
Opolifi oya holola yo kutya kapa li otuwa tai di kombinga yopate ikwao pefimbo loshiningwanima ngaashi omufekelwa ta ti.
Ndjadila okwa ti omufekelwa okwa twikila noku ka tula mo eindilo kehangano lotuwa yaye oko vati a yandja ouyelele woipupulu. Opolifi oya weda po yo kutya omufekelwa ina lopota oshiningwanima efiku sha ningwa, vati okwe ya okulopota kopolifi eshi a kufa po nale otuwa yaye.
Omufekelwa okwa tulwa moipandeko nokwa teelelwa a kale a holoka momhangu yaMangestalata mOshakati.
