Ehangano lyokwaandjaneka omawi mombepo MTC osho wo Rossing Foundation oga yambidhidha ehangano lyaanuulema tali ithanwa National Disability Council of Namibia nuutemba osho wo oshimaliwa. 

Sha ikolelela komushangwa gwa pitithwa koMTC, oya yambidhidha nuutemba wu li omu- 10 wongushu yoshimaliwa N$80 000 omanga Rossing Foundation ya yambidhindha noshimaliwa N$100 000 osho wo iikwathithilonga yongushu N$20 000, yaanangeshefa aakiintu taya lumbu nuulema. 

“Ongaaniilonga ya-MTC otwe ya po noprogalama yokugongela oshimaliwa, shokukwathela mboka ye li mompumbwe osho wo ye li monkaloitaayihokitha. Oprogalama ndjoka kayi shi yehangano lyo- MTC, ihe olyaaniilonga,” ya fatulula ngaaka. 

Ya nyola kutya shika kashi shi oshikando shotango taya yambidhidha ngaaka ihe oya kala nokukwathela oshigwana okuza omimvo dha zi ko. 

MTC okwa shanga kutya, oya gandja omakwatho ngoka okuyambidhidha oprogalama ya nuninwa okukwathela aantu ye na uulema moshilongo. 

Ehangano lyi na sha naanuulema okwa li lya holola enyanyu noya pandula eyambidhidho ndyoka. 

“Uutemba otau ka yambidhidha mboka ye na uunyengwi wokweenda ya kale taya inyenge nawa nota ya ka gwanitha po iilonga yawo yesiku kehe nuupu,” ya ti ngaaka. 

Ya gwedha ko kutya omakwatho ngoka otaga ka kwathela poompito odhindji aantu mboka ye li mompumbwe, notashi ke ya pa natango omukumo kutya oye niwe nayo koshigwana,” taya ti ngaaka. 

Taya ti, otaya ka totha mo ashike aantu mboka ye li lela mompumbwe, ya ganwa uutemba mboka wa gandjwa. “Natango otatu indile omahangano galwe ga kuthe oshiholelwa oshiwanawa sha ningwa komahangano ngoka gaali, okuyambidhidha aantu taya lumbu nuulema naashoka ye na po,” ya indile ngaaka. 

Omumvo kehe momasiku gatatu gaDesemba, ohaku dhimbulukwa esiku lyoInternationalDayofPersons with Disability (IDPD), nahugunina okwa li lya dhimbulukwa kohi yoshipalanyolo “okuyambula po aanuulema nokukwashilipaleka kutya inaya thigwa po kusha osho wo uuthikepamwe”. 

Oshipalanyolo osha li sha fatululwa kutya aanuulema ayehe itaya thigwa kondje kuuwanawa kehe, uuthike pamwe oshowo omayakulo omawanawa ga tengenekelwa omvula 2030 ndjoka ya tegelelwa, kutya kape na nando ogumwe ta ka patelwa kondje. 

Esiku ndyoka oha li ddhimbulikiwa kehe omvula oku yambula po aanulema noku ya pa oompito dha yooloka okuholola omaiyuvo gawo, noku yahololela esimano lyawo. 

Ohaya dhimbulukwa wo esiku ndyoka okupewa omukumo nomayele oshowo okufatululilwa omawuthemba gawo, ngaashi okumona elongo, iilonga, iikulya nosho tuu. 

-vkaapanda@nepc.com.na