Auleria Wakudumo 

Omukulunhuwiliki wouministeli wouyuuki noilonga Audrin Mathe okwa holola kutya eponokelo olo la ningilwa omweeti woihokolola Justine Shiweda kali shi ashike eponokelo kuye ndele eponokelo lovakalekipoveta moNamibia. 

Mathe okwa holola kutya eponokelo latya ngaha itali keli didimikilwa nouministeli otau longele kumwe nopolifi opo va kwashilipaleka kutya keshe ou ena mo onyala moshinima eshi okwa pewa ehandukilo lopombada. 

“Ita tu tilifwa keponokelo loshinouvaya latya ngaha. Ohatu ka longela kumwe novanambelewa vetanga leameno opo ovo va ponokela omweeti woihokolola va mone ehandukilo lavo,” Mathe ta holola ngaho. 

Omukulunhuwiliki okwa yandja omahekeleko lovawanedimo vaShiweda ponele youministeli aushe. Mathe okwa holola kutya Shiweda okwa li omunandjungu moilonga yaye nokwa longa noudiinini okuyakula Ovanamibia. Okwa ti oilonga yaye okwali ya fimana okukaleka po oveta yoshilongo nokukwashilipaleka kutya ouyuuki owa hangika. 

“Ohatu indile Ovanamibia aveshe opo ve li mange elyenge kumwe opo va longele kumwe nopolifi opo ku hangike ouyuuki moshinima eshi,” ta ti ngaho. 

Shiweda okwa li a ponokelwa moKotoba 2025 efimbo longula. Olopota yopolifi oya holola kutya omweeti woihokolola okwa yashwa tete ndele ta tilwa omeva oudiyo. 

Shiweda okwa li ta mono epango moshipangelo shopaumwene mOndangwa nokonima okwa ka tuminwa koshipangelo natango shopaumwene koWindhoek. 

Shiweda okwa xulifa Olomakaya. Okwa fiya ko ounona vavali, kamwe okena eedula omuwoi nakakwao okena eedula heyali. 

Pefimbo Kundana a talela po ovakwanedimo vaye peumbo lovakulunhu vaye molukanda Ekulukuma mOndang wa, ovakwanedimo ova holola kutya kave na oitya nomatumbulo okutya sha koshinima sha tya ngaha. 

Ovakwanedimo ova lombwela yo Kundana kutya nande oshitondoka sha ningilwa mOndangwa, otava ka ningila omalongekido aeshe komukunda Onambango moshitukulwa shaShikoto. 

Shiweda okwa li ena omido 30. 

-awakudumo@nepc.com.na