Auleria Wakudumo 

Omupresidente Netumbo Nandi-Ndaitwah okwa tumbaleka nokufimaneka ovaleli ovo vetu tetekela moukwaalushe, Omukokolipresidente Sam Nujoma oshoyo Omupresidente omutitatu Hage Geingob. 

Pefimbo ta yandje oshipopiwa shaye pedimbuluko lovaleli ava moWindhoek, omupresidente okwa holola ta ti otava dimbuluka omapenda avali, oo a longa oupendafule keshe umwe opefimbo laye. 

“Omapendafule a lela oshilongo keshe umwe opefimbo laye nomomukalo waye wuli lile, ashike nande ongaho aveshe ova kuma ondjokonona yaNamibia,” Omupresidente ta holola ngaho. 

Omupresidente okwa holola yo kutya omwedi waFebruali paife owa ninga omwedi oo Ovanamibia tava dimbuluka ovaleli vavo. 

“Ohatu dimbuluka oilonga yavo iwa oyo ya longa kemanguluko loshilongo oshoyo keyambule po nexumokomesho loshilongo olo la hovela omudo twa mona emanguluko mo21 Marsa 1990,” ta holola ngaho. 

Omupresidente okwa ti Nujoma naGeingob ova dana onghandangala memanguluko nexumokomesho loshilongo, umwe okwa li omupresidente wotete namukwao okwa li omuprima woshilongo wotete. 

Namibia ota kala nokudimbuluka ovaleli ava vavali muFebruali omwedi o ova xulifa. 

Omupresidente wotete waNamibia Sam Shafiishuna Nujoma okwa xulifa momafiku 08 Februali 2025. Nujoma okwa wanifa omudo medu omanga Omupresidente omutitatu waNamibia Hage Geingob ali a xulifa momafiku 04 Februali 2025. Geingob okwa wanifa eedula mbali medu nghene etu tetekela. 

Nujoma okwa xulifa mepupi lomido 95. Nujoma okwa ninga Omupresidente momudo 1990 fiyo 2005 omanga Geingob a xulifa mepupi lomido 83. Geingob okwa ninga omupresidente momudo 2015 fiyo osheshi a xulifa mo2024. 

-awakudumo@nepc.com