Ehangano lyedhina Shilongo Gravestones and Funeral Services olya yambidhidha osipana yetanga lyokoompadhi yoVietnam Rangers nomatanga osho wo iikutu yongushu N$10 000. 

Ehangano ndyoka olya kwathele ngaaka okuyambidhindha aanyasha oshowo okuhwahwameka omaudhano. 

“Okugandja omayambidhidho geli ngiika oshitopolwa shehangano lyetu, sho shoka ha tu kwathele mboka yeli mompumbwe oshowo mboka twa ndhindhil ike taya pumbwa omakwatho,” ta fatulula ngaaka. 

Ya ti, ehangano lyawo olya ndhindhilike wo kutya ngele taya yambidhidha aanyasha otaye ya longekidhile wo onakuyiwa ombwaanawa. 

Ya gwedha ko kutya , ehangano lyawo ota li tsikile okuyambidhidha aanyasha opo ku vulwe oku tothwa mo mboka yena iitalenti, ya vule okueta po omalunduluko moshilongo. 

“Otwa hala wo oku kumagidha omahangano moshilongo ga kale taga yambidhidha aanyasha opo ya vule okuulika iitalenti yawo,” ya pula ngaaka. 

Omukwateli komeho gosipana yomaudhano gwoVietnam Rangers Nekundi Iipumbu okwa pandula sho ya yambidhidhwa, ta ti omakwatho ngoka otaga hwahwameke aadhani ya dhane neyitulemo nokutula osipana yawo ponkatu yopombanda. 

Iipumbu ta ti oya pandula sho ya yambidhidhwa ngaaka na sho oyo ya ningi aanelago okutothwa mo. 

“Omatanga ngaka otaga k andula po ompumbwe yomatanga, onkene otwa pandula,” ta ti ngaaka. 

Iipumbu okwa indile wo aanangeshefa oshowo omahangano ga kutheko oshi holelwa oshiwinawa opo ga kale taga yambidhidha oosipana dhi vule okuyambuka po. 

Omaudhano ngoka gali po kati koVietnam Rangers o noFoxy Senior Olyomakaya kokapale Severin Kambonde Gabriel Ashivudhi Stadium, ogali ga ende nawa sho ayehe ya tula mo yimwe mu yimwe. 

-vkaapanda@nepc.com.na